Aqtaý áýejaıyna qonǵaly jatqan ushaq ushqyshynyń kózine lazer túsirilgen, - dep habarlaıdy «Qamshy» portaly Tengrinews.kz– ke silteme jasap.

«Aqtaý halyqaralyq áýejaıy» AQ atqarýshy dırektory Erǵazy Joldasovtyń aıtýynsha, mundaı oqıǵa áýejaıda eki ret bolǵan. Sońǵy oqıǵa 13 sáýir kúni oryn alǵan kórinedi.

Ushaq qoný jolaǵyna túskende Eır Astana kompanıasyna tıesili KS-313 áýe kemesiniń ushqyshy jasyl tústi lazermen kóziniń tumshalanǵanyn habarlaǵan. «Ushqyshtyń aıtýynsha, áýejaı syrtyndaǵy daladan túsirilgen lazerdiń áser etý kúshi óte joǵary bolǵan. Bul qaýipti áreket. Óıtkeni, lazer túsken soń ushqysh aınalasyn birneshe sekýndqa deıin baǵdarlaı almaı qalady. Ushaqtyń qoný, ushý sátinde bul sekýndtar óte mańyzdy. Soǵan oraı, biz áýejaı aımaǵyndaǵy turǵyndardyń jaqsylap oılanýyn suraımyz», - deıdi Erǵazy Joldasov.

Esterińizge salsaq, bir jyl buryn Aqtaý áýejaıynda taǵy bir osyndaı oqıǵa bolǵan. Onda da Eır Astana kompanıasynyń ushaǵyna lazer túsirilgen. Áýejaı basshylyǵy polısıaǵa aryz jazǵanmen, buzaqy tabylmaǵan kórinedi.