Oral qalasynda kúni búgin 17144 búldirshin balabaqsha kezeginde tursa, sonyń 1500-i - 3-6 jastaǵylar, - dep habarlaıdy Qamshy.kz QazAqparatqa silteme jasap.

Bul týraly Oral qalasynyń ákimi Narıman Tóreǵalıevtiń tóraǵalyǵymen ótken memlekettik-jekemenshik áriptestik aıasynda mektepke deıindi bilim berý júıesine ınvestısıa tartý máselelerine arnalǵan keńeste aıtylǵan.

Shahar basshysynyń atap ótkenindeı, baldyrǵandardy mektepke deıingi tárbıemen jáne oqytýmen qamtamasyz etý - 2020 jylǵa deıingi bilim berýdi damytýdyń memlekettik baǵdarlamasy men Oral qalasy damý baǵdarlamasynyń basty ındıkatorlarynyń biri. Oralda Elbasy tapsyrmasyna sáıkes «Balapan» baǵdarlamasy boıynsha jumystar belsendi júrgizilip jatqanymen, demografıalyq jaǵdaıdyń jaqsarýyna baılanysty balabaqshaǵa degen qajettilik te ósip keledi. Mysaly, qalalyq bilim berý bóliminiń málimetine sáıkes shaharda 2-5 jas aralyǵyndaǵy 11400 baldyrǵan kezekte tursa, úlgi jobadaǵy 1 balabaqsha 280 oryndyq dep alǵanda, oblys ortalyǵyna áli qyryqqa jýyq mektepke deıingi uıym kerek. Ásirese, kezektiń kóptigi Zashaǵan kenti men qalanyń ortalyǵynda, 5, 6, 7, 9-shaǵynaýdandar men «Juldyzda» baıqalady. Sondyqtan memlekettik-jekemenshik áriptestikti paıdalana otyryp, jekemenshik balabaqshalar ashýǵa da basa nazar aýdarý qajet.

Jıynda «Oral» ÁKK» UK» AQ strategıalyq damý jáne ınvestısıalyq jobalar departamentiniń dırektory Artýr Dosqalıev, Oral qalalyq bilim berý bóliminiń basshysy Jansulý Tóremuratova óz usynys-pikirlerimen bólisti.

Keńes qorytyndysyna sáıkes qalalyq sáýlet jáne qala qurylysy bólimine jekemenshik balabaqshalar ashý úshin qajetti jer telimderin aıqyndaý tapsyryldy.

Aıta keteıik, Oralda 92 mektepke deıingi uıym bolsa, sonyń ishinde 50-i memlekettik, 26-sy mektep janyndaǵy shaǵyn ortalyq, bireýi mektep-balabaqsha kesheni, 15-i - jeke balabaqsha. Bularda 13232 búldirshin tárbıelense, sonyń 743-i nemese 6 paıyzy ǵana jeke balabaqshalarda.