Búgin Baýyrjan Baıbek basqa qalalardyń avtokólikterin qalaǵa kirgizýdi shekteý máselesi qarastyrylyp jatqanyn málimdedi, - dep habarlaıdy Qamshy.kz portaly.

Baspasóz máslıhatyn ótkizgen Baýyrjan Baıbek qaladaǵy aqyly avtoturaqtardyń tártibin retke keltirý kerek dep otyr.

«Turaqta turatyn kólikterdi alyp tastaımyz. Avtoturaq erejesin buzǵan jaǵdaıda qatań jazalaımyz. Munyń barlyǵyn birte-birte jasaımyz, ýaqyty kelgende qalaǵa aqyly kirý máselesi sheshiledi», -  deıdi qala basshysy.

Ákimniń málimetinshe, qalada búginde 570 myń avtokólik tirkelgen, taǵy 250-270 myń avtokólik kún saıyn megapolıske syrttan kiretin kórinedi.

Qala basshysynyń aıtýynsha, búginde turǵyndarǵa jeke kólikti emes, qoǵamdyq kólikti paıdalanýǵa yntalandyrý jumystary josparlanǵan.

«Biz taksı turaqtaryn shartty túrde saǵatyna 100 teńge tóleıtindeı etemiz. Eger nátıje shyqpasa, onda saǵatyna 500 teńgege deıin kóterip qoıamyz. Sonda adam ózi esepteı bastaıdy»,-deıdi qala ákimi.

Ákim bul máselede aldymen adamdardyń sanasyna ózgeris engizý kerek dep sanaıdy. «Bizge ekologıa kerek pe, álde bárimizdiń kólikpen júrgenimiz kerek pe? Ne isteý kerek? Osyny anyqtap alý kerek», - deıdi Baýyrjan Baıbek.