Qostanaı qalasynyń turǵyny Marfýǵa Seltetkenova bıyl 114 jasqa toldy. Qarıa, áli kúnge deıin kitap oqyp, án salady, - dep habarlaıdy Qamshy.kz  24.kz. arnasyna silteme jasap.

Tylda eńbek etken ana qazaq eliniń birneshe mereıtoılyq tósbelgilerin keýdesine taqqan. Marfýǵa áje ómir boıy qolynan qasıetti kitaptaryn tastaǵan emes. Jasynda medresede dinı saýat ashqan ol ana tilimen qatar orys, arab, bashqurt, tatar tilderin jetik biledi. Keıýana án de shyrqaıdy. Marfýǵa áje taǵdyr taýqymetin kóp tartqan. 1902 jyly Reseıde týyp, keıin zamana jelimen Meńdiqara aýdanyna keledi. Ashtyq, soǵystyń da kýási bolǵan ana tylda eńbek etken. Alǵashqy qosaǵynan erte aıyrylyp, shıetteı tórt balasymen ekinshi ret turmys qurǵan. Odan alty bala súıip, eki balany baýyryna basqan. Aýyr jyldary aýylda kolhoz jumysyna jegilip, kıim tigip, alasha toqyǵan.

"Nan pisirdim. Jumys istep júrgen adamdardyń kıimin de jýdym. Sol aýyldyń ýdarnıgi men boldym. Qandaı jumys berse bárin istedim", - deıdi tyl ardageri Marfýǵa Seltetkenova.

"Balyq aýlaýǵa, qus atýǵa kelgen kisilerdiń bári bizdikinde bolatyn. Bıe ustaıtyn da bizdiń úı bolǵan. Kórshiler osy kúnge deıin «áje, áje» dep bireýimizben de bir ursysyp, ne jaman sóz aıtyp kórgen emes, bárimizdi de qarsy alyp otyrady. Allanyń jolynda júrgesin, ylǵı jaqsylyq jasaǵasyn da uzaq jasaǵan shyǵar dep oılaımyn", - deıdi 69 jastaǵy qyzy Jibek Qurmanova.

114 jastaǵy ana qoǵam ómirinen shet qalmaq emes. Ájeı bıylǵy saılaýda saıası tańdaýyn jasap, el erteńi úshin daýys bergen. Qazir ol tamyryn tereń jaıǵan báıterek syndy. Bes balasynyń kózi tiri. Nemere, shóbere, shópshegi alpystan asady.

 «Tabıǵı, ulttyq taǵam jáne sabyr, eńbek, meıirim men tazalyq ǵasyrdan artyq ǵumyr keshýiminiń basty syry» - deıdi qeıýana.

Qazirgi ýaqytta uzaq jasaǵan ájeıdiń urpaǵynyń bir sheti sonaý Dýbaıda turyp jatyr. "Aqtaýda, Almatyda, Shymkentte, Chelábide, Astanada, Óskemen, bar jerde turyp jatyr, aǵaıyndar kóp", - deıdi keıýananyń qyzy.