Petropavldyń ortalyq bazaryndaǵy saýdagerlerden «Orys álemin» qarjylandyrý úshin aqsha jınalǵan, - dep habarlaıdy Qamshy.kz.
Bul týraly saýdagerler Soltústik Qazaqstan oblystyq kásipkerler men tutynýshylar quqyǵyn qorǵaý qaýymdastyǵy men qalalyq memlekettik múlik departamenti syndy organdarǵa shaǵymdanǵannan soń baryp qana belgili bolyp otyr.
Oblystyq kásipkerler men tutynýshylar quqyǵyn qorǵaý qaýymdastyǵynyń tóraǵasy Nadejda Dýbovanyń aıtýynsha, oǵan ortalyq bazardaǵy saýdagerler shaǵymdanǵan. Olarmen kezdesýge barǵan tóraǵany bazar kúzetshileri kirgizbeı, tosqaýyl jasaǵan. N. Dýbova osy keleńsizdik týraly qalalyq prokýratýraǵa aryz daıyndap qoıypty. Alaıda, qaýymdastyq basshysynyń aıtýynsha, kúzetshilermen bolǵan kıkiljiń bul daýdyń basy ǵana kórinedi.
«Bazardaǵy ashyq saýda qatarlaryn bazar ákimshiligi jabyq pavılondaoǵa almastyratyn kezde saýdagerlerden 600 myń teńgeden 2 mıllıon teńgege deıin aqsha jınalǵan. Alaıda, eshkimge ol pavılondardyń menshik quqyǵyn rastaıtyn qujattar berilmegen. Qaýymdastyqqa da osy máselege baılanysty shaǵym tústi. 23 sáýir kúni saýdagerler meni osy máseleni aqyldasýǵa shaqyrǵan bolatyn», - deıdi ol.
N. Dýbovanyń aıtýynsha bazar bir kezderi Qazaqstandaǵy kazak uıymdarynyń jetekshisi Iýrıı Zaharovqa tıesili bolǵan. Biraq, keıin saýda orny birneshe adamnyń atyna jazylyp, onyń esimi umyt bolǵan. Qazir bazar dırektory Edil Jalımov degen azamat bolǵanymen, býtıkterdi jalǵa alýshylar Maksım Vagner degen jeke kásipkermen kelisim-shartqa otyrǵan kórinedi.
2015 jyldyń aqpanynda qala basshylyǵy men prokýratýra mamandary bazar ákimshiligine saýdagerlerge býtıkterge menshik quqyǵyn beretin qujattardy usynýdy mindettegen. Alaıda, az ýaqyt ótken soń jalǵa alý quqyǵyn beretin qujat tapsyrylǵan.
Bul túsiniksiz qujatqa rıza bolmaǵan kásipkerler memlekettik kiris departamentine shaǵymdanyp, onda ózderi bazar ákimshiligine qyrýar qarjy tólep, alaıda eshqandaı rastaýshy qujatqa qol jetkize almaı otyrǵandyqtaryn aıtqan. Osy jerde bireýlerdiń aqshany bazar ákimshiligine bergeni, endi bireýlerdiń ákimshilik usynǵan rekvızıtter boıynsha banktik aýdarym jasaǵany belgili bolady. Osy tusta bazardaǵy saýdagerlerden «Orys álemin» qoldaý úshin qarjy jınalǵany anyqtalyp otyr.
Saýdager Aınur Álibekova kiris departamentine jazǵan hatynda 2014 jyly sáýir aıynda 1 760 myń teńgege býtık alǵanyn, onyń aqshasyn «Rýsskıı mır» JSHS-nyń atyna kórsetilgen esep-shotqa «QAITARYMSYZ MATERIALDYQ KÓMEK» degen negizdememen aýdarǵanyn, alaıda, qolyna býtıkke menshik quqyǵyn beretin eshqandaı qujat berilmegenin jazǵan.
Al, kásipkerler quqyǵyn qorǵaýshy uıym ókilderi Soltústik Qazaqstan oblysy aýmaǵynda mundaı JSHS-niń tirkelmegenin anyqtaǵan. Kásipkerler bolsa, óz qoldarymen qyrýar qarjyny «Rýsskıı mır» uıymynyń shotyna qaıtarymsyz kómek degen tólem tapsyrysymen aýdaryp kelgen...
Darhan Muqantegi
