Advokat Jangeldi Súleımenov elde turaqtylyqty saqtaý maqsatynda áleýmettik jelilerdi jabýdy usyndy. Onyń aıtýynsha, áleýmettik jelilerdiń jumysyn retteıtin zań qabyldanǵansha ondaı jelilerdiń qyzmetine ýaqytsha tosqaýyl qoıylý kerek.
Zańger Feısbýk, VKontakte, Týıtter, Instagram syndy jelilerdi jumys ýaqytynda paıdalanýdy, onda búrkenshik attar men psevdonımder qoldanýdy, balalardyń paıdalanýyn shekteıtin talaptar engizý kerek dep sanaıdy. Sondaı-aq, J. Súleımenov áleýmettik jelide jalǵan aqparat taratqandarǵa jaýapkershilik júkteý tetikterin de qarastyrýdy usyndy. Zańgerdiń sońǵy usynysty ne úshin aıtyp otyrǵanyn túsinbedik. Óıtkeni, qoldanystaǵy zańnamalarda jalǵan aqparat taratýǵa baılanysty jaýapkershilik normalary kórsetilgen.
«Áleýmettik jeliler ókinishke oraı, ulttyq, áleýmettik alaýyzdyq, elde turaqsyzdyq týǵyzýdy kózdeıtin zıandy aqparattardy qoǵamǵa tastaý úshin jıi paıdalanylady. Árıne, áleýmettik jelilerdiń qoǵamdaǵy naqty jáne paıdaly máselelerdi sheshýge paıdalanylatyny jasyryn emes. Máselen, osyndaı jeliler jerdi jalǵa berýge qatysty bıliktiń nazaryn aýdartýǵa kómektesti. Áleýmettik jelilerge ýaqytsha shekteý qoıý azamattardyń aqparat alý quqyǵyn eshqandaı da shekteıdi dep oılamaımyn. Budan zardap shekse, tek blogerler zardap shegedi. Olar ýaqytsha post jaza almaı qalady, olardyń oqyrmandary da blogerdiń ne ishkeni, ne jegeni, ne satyp alǵany týraly oqı almaı qalady. Sondyqtan, azamattar bul aqparattarsyz birneshe aı ómir súre alady dep oılaımyn», - deıdi advokat.
J. Súleımenov mundaı shekteýdiń zıanynan paıdasy áldeqaıda kóp bolatyn kórinedi. Osy jerde zańger balalardyń jeli telmirýi, adamdardyń kúni-túni ýaqytyn jelide ótkizýi syndy turmystyq deńgeıdegi dúnıelerdi alǵa tarta otyryp, qoǵamdyq maǵyzdy másele kóterip otyr. Bul áńgime buryn da sóz bolǵan. Seksýaldyq sıpattaǵy, ıntımdik qyzmetterdi nasıhattaıtyn kontentter shynymen de jelide jetip artylady. Ol týraly dabyl qaǵyp, tipti, tıisti zań qabyldaý qajettiligin talap etkender buǵan deıin de kóp bolǵan. Al, áleýmettik jelini shekteý týraly áńgimeniń bul joly qaıta kóterilýi balalardyń tárbıesine, rýhanı-moraldyq qundylyqtarǵa alańdaýshylyqtan góri saıası sebepterge kóp qatysty sıaqty.
Jomart Abdollauly
