Semeıde 9 mamyrdaǵy Jeńis kúnine arnalǵan áleýmettik jarnama qala turǵyndary men ardagerlerdiń yzasyn keltirdi. Turǵyndar bannerdegi "Atalarymyz fashızmdi jeńdi, al biz daǵdarysty jeńemiz" degen sóılemdi dóreki qoldanylǵan dep esepteıdi, - dep habarlaıdy KTK.

Banner qala ortalyǵynda osydan eki kún buryn ornatylǵan eken. Ol Internette de qyzý talqylanyp jatyr. Biri muny nadandyq dese, endi biri ardagerlerdi mazaq qylý dep topshylaǵan. Tipti "ekonomıkalyq daǵdarysty jeńý úshin kimmen soǵysý kerek?" degen mysqyl suraqtar da qoıylypty.

Ásirese, soǵys ardagerleri surapyl jyldardy daǵdaryspen salystyrǵandarǵa renishterin bildirip otyr. "Mynany jasaǵan adam saýatsyz. Ol soǵysta bolǵan joq. Sondyqtan onda tógilgen qandy bilmeıdi. Oǵan ákep daǵdarysty teńep otyr. Al bul ekonomıkalyq jaǵdaıda eshkim bir-birin atpaıdy ǵoı. Asyra siltep jazbas buryn oılaný kerek", - dedi soǵys ardageri Petr Kolomen.

Neshe kúnnen beri jurt jumylyp synaǵan bannerge qalalyq ákimdik tapsyrys ta, ruqsat ta bermegen. Onyń ıdeıasynan buryn tilge qatysty zańdylyq ta saqtalmapty. Endi saıasat bólimindegiler "oryssha bannerge tilderdi damytý bólimi shara qoldanady" deıdi.