Jer taǵdyryna alań bolǵan atyraýlyq aǵaıynnyń, Astana, Almaty, Oral qalalarynda ótken narazylyq sharalaryndaǵy eldiń talaby Elbasynyń qulaǵyna jetti. «Ana tilimiz qaǵajý kóredi. Jas urpaq máńgúrttenýi múmkin» dep kópshilik dabyl qaqqan «úsh tildi oqytý» júıesine, jalpy bilim reformasyna qatysty da prezıdent pikirin bildirdi.
Aldyńǵy kúni Bas prokýratýradaǵy jıynda Elbasynyń zańdar tıisti deńgeıde halyqqa túsindirilmeıdi degeni tegin emes. Elbasy el ishindegi áńgimeden habary bolmasa, halyqtyń narazylyǵyn sezbese mundaı málimdeme jasar ma edi?
Keshegi ótken halyq Assambleıasynyń sezinde de jer máselesi kóterildi. Prezıdent kópti alańdatqan ózekti máselege núkte qoıarlyq sózder aıtty. «Qazaqtyń dalasy – halyqtyń menshigi. Qazaqstannyń 14 myń sharshy km shekarasyn shegendeý úshin men 8 jyl kelissózder júrgizdim» degen N.Nazarbaev memleket jerdiń jat jurttyqtardyń menshigine ótip ketpeýi úshin bar qajetti jasaıtynyn basyp aıtty.
Bilim júıesindegi bylyqtan da birazymyz habardarmyz. Tómengi synyp oqýshysy kún saıyn mektepke arqalap baratyn sómkesiniń salmaǵy onyń mektepte alatyn biliminiń salmaǵyna saı emestigin de bilemiz. Biz ǵana emes, ony Elbasy da biletin sıaqty. Bilim jáne ǵylym mınıstri E. Saǵadıevti synaǵan Elbasynyń naqty pánderge qatysty aıtqandary ázirge usynys kúıindegi sózder ekenin eskere otyryp, Prezıdent bul tarapty da baqylaýynda ustap otyrǵanyn kóresiz.
Bulardy tizbekteı otyryp aıtpaǵymyz ne? Aıtpaǵymyz, halyq únin estir qulaqqa jetkizetin joldar bar. Ol joldy da halyqtyń ózi taýyp otyr. Osy kúnge deıin el azamattarynyń bılik organdaryna baǵyttaǵan túrli ashyq hattary men petısıalaryna kópshilik túrlishe baǵa berdi. Birimiz jarysa qoldap, qol qoısaq, endi birimiz «Ónbeıtin is» dep qoldy bir-aq siltedik. Tipti, bilim berý salasyndaǵy reformalarǵa alańdaýshylyq bildirgen halyqtyń ashyq hatyn sala basshysy «Olar ózderin ǵana oılaıtyn egoıster. Basqa jurttyń sapaly bilim alǵanyn kóre almaıdy» dep aıyptaýǵa deıin bardy. E. Saǵadıev myrza keshe sol sózderin nege Elbasynyń aldynda aıtpady? Ashyq hat jazǵandar «baıdyń malyn qyzǵanǵan baıqustar» ekenine senimdi bolsa, «shý kótergish, ońbaǵandardyń aıybyn» betterine basar edi ǵoı. Olaı isteı almady.
Demek, halyq belsendileri uıymdastyrǵan ashyq hattar óz mindetin atqardy. Eldiń úni Elbasyǵa jetti. Bul – sózsiz halyqtyń jeńisi. Al, kesheli beri kóterilip jatqan «áleýmettik jelilerdi jabý kerek» degen bastamalar, Elbasyny elinen qyzǵanǵan áldebir toptardyń áreketi bolýy múmkin.
Darhan Muqantegi
