50 zańdy bir toqsanda qabyldap tastap, aýzy kúıgen depýtattar jańa zańdardy endi  maıshammen qaraýǵa kiristi. Kúni keshe Muhtar Tinikeev pen depýtat Jamalov arasyndaǵy janjalǵa sebep bolǵan «kolektorlyq qyzmet týraly» zań,  búgin májilismender arasynda taǵy da daý týǵyzdy, dep habarlaıdy 31 arna.

Ózi jumys isteıtin bar-joǵy 8 mıllıon turǵynnyń 5 mıllıony bankke qaryz, nesıe alǵan. Solardyń jartysynan astamy qazir qashyp júr eken, qaryzyn qaıtara almaıdy.

Qaryzdy qaıtaratyn agentter qajet degen Ulttyq banktiń usynysyna, depýtattar qarjy ortalyǵynyń ózine qarsy tap berdi.

«Bankter barlyǵyna nesıe taratyp bitti. Qaryz alatyn adam qalmady. Endi olar zeınetkerlerge nesıe berip, qýlyqqa baryp otyr. Olar zeınetaqysyn alyp, dári alaıyn dese de banktegi agentter qarıanyń qolyna tımeı jatyp qarjyny sypyryp alady», - dedi QR Parlamenti Májilisiniń depýtaty Danıa Espaeva.

Zeınetkerlerden paıyzdy jyryp otyrǵany bylaı tursyn, bank kesirinen ózine qol jumsaǵandardy aıtty depýtattar. Burynǵy ustaz, qazir májilis minberindegi Irına Smırnova tipti jalaqsyn jasyrǵan jumyskerlerdi tanıdy eken. Otqa maı quıatyn kolektorlar kelse, qylmys artyp, maskaly «mafıa» paıda bolady degender de tabyldy. Sebebi kórshi Reseıde kolektorlar qaryzdy jaýyzdyqpen qaıtaryp, naǵyz reketshildikke baryp júrgeni biraz aıtylǵan. 

«Olar kepildiksiz de berip jatyr. Magazın ishinde de solar berip jatyr. Halyq kelip alady da, prosenti kóp qaıtara almaıdy. Kolektorlar keledi de jaǵdaı odan saıyn nasharlaıdy»,-deıdi QR Parlamenti Májilisiniń depýtaty Nurtaı Sabılánov.

Jaǵdaıdyń nasharlamaıtynyna senimdi Omarhan Óksikbaev bank pen boryshker arasynda ǵana emes, kórshi-qolań, tanys pen aǵaıynnan da alashaǵyn ala almaı júrgenderge agent jiberip, qaryzdy qaıtarý kerek deıdi. Osylaı zań aıasyn keńeıtpek.