Búgin Almatyda Ulttyq baspasóz klýby aldynda jer máselesine qatysty mıtıń ótkizýge ruqsat suraıtyndary týraly baspasóz jıynyn ótkizbek bolǵan 10-ǵa tarta belsendini polısıa ustap áketti, - dep habarlaıdy Qamshy.kz portaly.

Jıyn saǵat 11-de ótýi tıis bolǵan. Biraq jıyn bastalatyn ýaqyt taıaǵanda polısıa kelip, ony uıymdastyrýshylardyń biri Marjan Aspandıarovadan túsinikteme jazýdy talap etti. Belsendi ony jazýdan bas tartty.

Birer mınýttan soń klýb aldyna polısıa jasaǵy kelip, saıasatkerler Marjan Aspandıarova, Ámirjan Qosanov, belsendiler Janbolat Mamaı, Inga Imanbaı, Ǵalym Aǵeleýov, jýrnalıs Ermurat Bápı men qarsylyq tanytqan taǵy eki-úsh adamdy kúshpen kólikterge mingizip alyp ketti.

Al baspasóz jıynyna deıin jýrnalıs Rysbek Sársenbaı men qoǵamdyq belsendi Muhtar Taıjandy da polısıa ustap áketkeni habarlanǵan bolatyn.

Aıta keteıik, uıymdastyrýshy belsendi top  keshe "baspasóz jıynynda "Jerimizdi qorǵaımyz - Ana tilimizdi saqtaımyz!" degen atpen Almatyda jalpyhalyqtyq mıtıń ótkizýge ruqsat suraý týraly qala ákimdigine ótinish berý máselesin talqylaıtyndaryn" habarlaǵan edi.