Almatyda qyryqqa jýyq adam ǵalamtordaǵy habaralandyrýǵa aldanyp qaldy. Tipti, mıllıondaǵan aqshalaryn alaıaqtarǵa ózderi sanap beripti. Megapolıs turǵyndary ınternet arqyly arzan kirpish satyp alamyz dep, aqyry jer sıpap qalǵan. Al aılasyn asyrǵandar qazir iz tússiz joq bolyp ketip, oryndaryna máseleden habarsyz esepshilerin qaldyryp ketken. Ne kirpish, ne aqshasyz qalyp, aýzy kúıgen adamdardyń sany kún sanap kóbeıip keledi.
Nurlan Ormahaev jaldamaly páterdi bosatyp, jeke úı salamyn dep 2 jylǵa jýyq ýaqyt daıyndalǵan eken. Boı kóterer baspanasynyń jobasyn syzyp, jerin qazyp barlyq kerek-jaraqty daıyndap qoıǵan. Tek jetispeı turǵany kirpish eken. Kópten kútken josparyn iske asyrý úshin jigit tez arada ǵalamtor arqyly kirpishke tapsyrys bergen. Alaıda aqshasyn alǵandar endi izim-ǵaıym joq.
- 40 myń kirpishke 12 teńgeden 480 myń teńge aqsha tastap kettim. 15 mamyr kúni maǵan alyp kelý kerek. Biraq men habarlassam bul kompanıanyń jumys istemeıtini , tek qaǵaz júzinde bolǵany anyqtaldy. Men sıaqty jábirlenýshiler kóp, - deıdi Nurlan Ormahaev.
Al Almaty qalasy İİD baspasóz hatshysy Saltanat Ázirbek Qylmystyq kodekstiń 190 baby, 4 tarmaǵy boıynsha asa iri kólemde alaıaqtyq faktisi boıynsha tekseris júrgizilip jatyr. Norma boıynsha kúdiktiler 7 jylǵa deıin bas bostandyqtarynan aıyrylý múmkin ekendigin aıtady.
Qazir «Otar Stroı» kompanıasynyń ǵalamtordaǵy jeke saıty istemeı tur. Tek osy kompanıada qyzmet qylyp, kópshiliktiń aqshasyn jınap otyrǵan esepshi qyz ǵana barlyǵynyń aldyna kelip mán jaıdy túsindirgen. Aıtýynsha ol basshylyqty esh ýaqytta kórmegen . Tek ortalarynda bir deldaldy ǵana bilemin deıdi. Ázirge polısıaǵa aryz jazyp kelgender sany ósip jatyr. Tártip saqshylarynyń sózinshe eldi aldap soqqandardy tabý qıynǵa soqpaıdy.
