Seısenbi eldegi saıası aýys-túıistermen bastaldy. Prezıdent Ákimshiliginiń basshysy Nurlan Nyǵmatýllın laýazymynan bosap, Májiliske bardy. PÁ-ge Astana ákimi Ádilbek Jaqsybekov barady degen sybys bar. Buǵan deıin Jaqsybekov premerlikke daıyndalyp jatyr degen de áńgime shyqqan.
Al, Astana ákimdigine Investısıa jáne damý mınıstri, kezinde vıse-premerlikti de alyp júrgen Áset Isekeshev taǵaıyndalmaq deıdi Aqorda aınalasyndaǵy joramalshylar. Nesi bolsa da jaqyn arada belgili bolady. Ázirge N. Nyǵmatýlınniń Májilis depýtattyǵyn, B. İzmuhambetovtiń «Ardagerler uıymynyń» jetekshiligine saılanǵany týraly ǵana ersmı aqparat taraýda. Joramalshylar N. Nyǵmatýlınniń Májilis spıkerligine saılanatynyn, al, B. İzmuhambetov ardagerler arasyna barǵanymen, depýtattyq mandatyn tapsyra qoımaıtynyn boljaǵan edi.
Endigi bir qyzyq boljam – Premer-mınıstr Kárim Másimovtiń taǵdyry. Sońǵy bir aıǵa jýyq ýaqytta úkimet basshysyna aqparat quraldary arqyly edáýir shabýyldar jasalýda. «Qoı aýzynan shóp almas» keıbir jýas basylymdarǵa deıin premerge qarata qahar kórsetýinen-aq biraz nárseni túsinýge bolady. Kópten beri aqparattyq alańda kórinbeı ketken premer-mınıstrdiń qaıtadan tóbe kórsetýin, óńirlerge saparlaýyn da «kezdeısoq belsendilik» deı almaısyz.
Bılik aınalasyndaǵy sarapshylar el ishindegi qoǵamdyq-saıası kóńil-kúıdiń muqıat zerttelip otyratynyn, árbir saıası sheshim, onyń ishinde kadrlyq taǵaıyndaýlar da bar, sol halyqtyń kóńil-kúıin eskere otyryp jasalatynyn aıtady. Osy logıkaǵa salsaq, Kárim Másimov shynymen ornynan bosaıtyn bolsa, Qazaqstanda oǵan laıyq deıtin qandaı laýazym bar. Birneshe dúrkin premer bolǵan adamdy «Halyq banktiń» basshylyǵyna qoıa qoımas. Parlamenttiń aınalasynan da elestete almaımyz ol kisini. Demek.... Iá, úırenshikti ádispen elshilikke jiberýge bolady. Biraq, qaıda? Qytaıǵa jiberse, onsyz da byqsyp jatqan shalaǵa maı quıǵandaı bolady. Soǵan qaraǵanda, Kárim Másimov Máskeýge tartýy múmkin. Al, ol jaqta 2014 jyldyń aqpanynan beri júrgen Marat Tájın elge oralýy tıis. Marat Tájındi qazaqstandyq ıdeologıanyń aldaspany demese de, uqypty uıymdastyrýshysy dese bolady. Demek, M. Tájınniń Reseıde júrgeninen Qazaqstanda qyzmet etkeni áldeqaıda tıimdi. Onyń ústine Eýrazıalyq Odaqtyń uıymdastyrýshylyq jumystary aıaqaldy. Uıym júıeli rejımde jumys isteýde.
Qaıtyp kelgende M. Tájın qaıda barady? Prezıdent ákimshiligin basqarady deıin desek ol laýazymdy Ádilbek Jaqsybekov «alyp qoıdy». Ákimdikke qoısa taǵy da kózge qorash kórinedi. Odan da ámbebap kadr Gúlshara Ábdihalyqovany depýtattyqqa ne mınıstrlikterdiń birine ysyryp, Memlekettik hatshynyń portfelin ustatqan jón-aý. Óıtkeni, ıdeologıa máselesi el aýmaǵynda sońǵy jyly aıtarlyqtaı aqsap tur. Bir ǵana M. Tájınniń týǵan jeri Aqtóbedegi terorıstik aktiniń ózi bul salada áttegen-aılardyń az emestigin ańǵartady. "Salafızmmen soǵys" naýqanyna da myqty uıymdastyrýshy kerek degendeı...
Bul aıtylǵandardyń barlyǵy boljam, árıne. Aına qatesiz oryndalady deýden de aýlaqpyz. Bastysy, taıaq jerge tastaldy, nátıjesin ýaqyt kórsetedi.
Jomart Abdollauly
