Alash arystary taǵy bir jańǵyrmaq. 23 maýsym kúni Astana qalasyndaǵy Ulttyq kitaphanada «Alash aıtqan asyl sóz» atty kitaptyń tusaýkeseri ótedi, - dep habarlaıdy Qamshy.kz.

«Jańa kitap Qazaq eli Táýelsizdiginiń 25 jáne Alashorda Úkimetiniń basshysy Álıhan Bókeıhannyń 150 jyldyǵyna oraı jaryqqa shyǵyp otyr. Sondaı-aq, 1916 jylǵy Ult-azattyq kóterilisiniń 100 jyldyǵyn da qaperden shyǵarǵanymyz joq. Jınaqqa ult kósemi Álıhan Bókeıhannan bastap Smaǵul Sádýaqasulyna deıingi 25 Alash arystarynyń oı-tolǵamdary men qanatty sózderin toptastyryp berip otyrmyz. Osy rette 25 Alash arystaryn iriktep, olardyń qanatty sózderin jarıalaýymyzdyń tegin emestigin aıta ketken jón. Óıtkeni, bıyl Táýelsizdigimizdiń 25 jyldyǵy, osyǵan oraı oqyrman qaýymǵa 25 Alash arysynyń qanatty sózderin syı retinde tartý etýdi aldymyzǵa maqsat etip qoıdyq. Bul bastamany 2 jyl buryn Shymkentte qyzmette júrgende qolǵa alǵan edim», - deıdi joba avtory Berik Ýálı.

Joba avtory Alash arystarynyń tom-tom eńbekterin aqtaryp, injý-marjan sózderdi iriktegen jýrnalıs Serik Joldasbaı men tarıhshy Erkin Erlanulyna, kitaptyń jaryq kórýine qoldaý kórsetken Beken Qonysov pen Erkebulan Qurmanǵalıevke alǵysyn bildiredi.

«Ókinishke qaraı, óz qaıratkerlerimizdiń qanatty sózderin qaperden shyǵaryp alyp jatamyz. Áıtpese Álıhan Bókeıhan aıtqan qanatty sózder Atatúrik pen Djordj Vashıngtonnan esh kem emes. Aıtalyq, Vashıngton: «Elim maǵan ne beredi dep emes, men elime ne beremin» dep oılaýymyz kerek?» dese, Álıhan Bókeıhan: «Tiri bolsam, han balasynda qazaqtyń haqysy bar edi, qazaqqa qyzmet qylmaı qoımaımyn» deıdi. Úndestik bar ma? Bar. Jalpy kitapty paraqtap qarap shyqsańyz, «Apyraı, á» degizetin qanatty sózder óte kóp» deıdi Berik Ýálı. Muny kitapqa pikir jazǵan belgili alashtanýshy – ǵalym Tursyn Jurtbaı da aıtyp otyr.

Mine, osyndaı qundy kitapty oqımyn deseńiz, Almaty qalasyndaǵy «El shejiresi» baspasyna habarlasyńyz (Abaı dańǵyly 143, kabınetter: 403, 413. tel; 394-42-04, 394-42-91).

Sondaı-aq, kitapty Shymkentte Beken Qonysovtan, Astanada Serik Joldasbaıdan «Alash aıtqan asyl sóz» kitabyn satyp alýyńyzǵa bolady. Al, Astanalyq aǵaıyndy «Alash aıtqan asyl sóz» atty kitaptyń tusaýkeserine shaqyramyz. Tusaýkeser 23 kúni saǵat 11:00 –de  Astanadaǵy Ulttyq kitaphanada ótedi. Eger oqyrman tarapynan qyzyǵýshylyq bolyp jatsa, atalmysh kitaptyń tusaýkeserin Alashtyń astanasy atanǵan Semeıden bastap basqa qalalarda da ótkizýge múmkindik bar.