Qazaqstan Respýblıkasynyń Konstıtýsıasy kúni qarsańynda, sonymen qatar Qazaqstan Respýblıkasy Táýelsizdiginiń 25 jyldyǵyna oraı, tamyzdyń 12-13 kúnderi Ulttyq ulannyń Almatyda ornalasqan «Ońtústik» óńirlik qolbasshylyǵyna qarasty 5571 áskerı bóliminiń bazasynda Almaty qalasy jáne Almaty oblysynan áskerge shaqyrylǵan sarbazdardyń ata-analarymen ashyq esik kúnderi ótti, - dep habarlaıdy Qamshy.kz.
Bul shara «Konstıtýsıa jáne quqyq tártibi kúzetinde» atty aksıa aıasynda «Jaýyngerlik januıadaı uıysqan, Ulttyq ulan – eli men halqyna qorǵan!» degen uranmen uıymdastyrylyp otyr.
Atalǵan sharany alǵysózimen ashqan Ulttyq ulan Bas qolbasshysynyń tárbıe jáne áleýmettik-quqyqtyq jumystar jónindegi orynbasary general-maıor Muhametqalı Satov jınalǵan sarbazdardyń ata-analaryna qoǵamdyq tártip pen qaýipsizdikti qamtamasyz etý áskeriniń jaýyngerlik qyzmeti men atqaratyn mindetteri týraly áńgimelep, kóptegen ata-analardyń suraqtaryna jaýap berdi. Bir qyzyǵarlyǵy, Otan aldyndaǵy boryshyn óteýge Atamekenge oralǵan qandastarymyzdyń da barshylyǵy. Týǵan mekenin ańsap elge oralǵan Telemesov Qanat aǵamyz Otan aldyndaǵy boryshyn ótep jatqan ulynyń kelisimshart negizinde qyzmette qalǵysy keletinin aıtyp, oǵan qandaı qujattar kerek ekenin surasa, kóptegen ata-analar uldarynyń Ulttyq ulan ýnıversıtetine túsý múmkindikteri týraly surap jatty. Jınalǵan kópshiliktiń kókeılerinde júrgen suraqtarǵa jaýap bergen soń, Ulttyq ulannyń bas tárbıeshisi qyzmette úzdik shyqqan sarbazdardyń ata-analaryn Ulttyq ulan Bas qolbasshysy general-leıtenant Rýslan Jaqsylyqovtyń atynan gramotalarmen marapattady.
Bunymen qosa osy is-sharaǵa arnaıy kelgen Almaty qalasy İshki ister departamenti kadrlyq jumystar jónindegi basqarma bastyǵynyń orynbasary polısıa polkovnıgi Zakır Bagıev ata-analarǵa Ulttyq ulan qatarynda boryshyn ótkergen sarbazdardyń İshki ister organdarynda da qyzmetke turý múmkindigi joǵary ekendigin atap ótip, qujattardy qalaı rásimdeý, qaı jerlerge baryp habarlasý retterin túsindirdi.
Ulttyq ulan áskeri týraly jalpy málimet alǵan soń, kópshilik nazaryna balalarynyń sálemdemesi joldanǵan beınejazbalar usynylyp, perzentteri qyzmet atqaryp jatqan áskerı bólimnen tikeleı baılanysta habarlasýǵa múmkindik týdy. Eń alǵash bolyp ata-analarymen vıdeobaılanysqa Shymkent qalasynda ornalasqan 6506 áskerı bóliminde mindetterin atqaryp júrgen Almaty oblysynyń sarbazdary shyqty. Óz uldaryn kóre sala úlken ekranǵa telmirgen analar qaýymy balalarynyń aman-esen ekenin kórip daýystaryn estigende, keıbiri qýanyshtan kóz jastaryna da erik berdi.
Osylaı jalǵasqan shara barysynda Qazaqstannyń túkpir-túkpirindegi Ulttyq ulannyń 23 áskerı bólimderimen tikeleı baılanys uıymdastyrylyp, ata-analar balalarynyń amandyǵyn kórip kózaıym boldy.
Aıta keterligi, osy kúni Ulttyq ulannyń áskerı bólimderinde qurylǵan Áıelder keńesiniń kontaktileri sarbazdardyń jaqyndaryna berildi, osy nómirler arqyly ata-analar aldaǵy ýaqytta uldarynyń qyzmeti qalaı ótip jatqanyn ózderinen bile alady. Munan bólek, ata-analarǵa áskerı bólimge ekskýrsıa uıymdastyryldy, ıaǵnı olar bólim aýmaǵyn, sarbazdardyń jatyn ornyn, asqanasyn, medısınalyq lazaretin kórip, qarý-jaraq jáne tehnıkasyn tamashalady.
Atalǵan sharaǵa joǵaryda atalǵan laýazymdy tulǵalardan bólek Almaty qalalyq Qorǵanys isteri jónindegi Departamenti bólim bastyǵynyń orynbasary – áskerı qyzmetshilerdi shaqyrylym jáne kelisimshart negizinde jınaqtaý basqarmasynyń bastyǵy polkovnık Farhat Qurmanǵojınov, Almaty qalalyq İshki saıasat basqarmasynyń ókili Rıta Ermanova, sonymen qatar óńirlik qolbasshylyq ofıserleri men 5571 áskerı bóliminiń laýazymdy tulǵalary qatysty.
Taǵy bir aıta keterligi, osy jyldyń maýsym aıynda qarýly top lańkestik shabýyl jasaǵan Aqtóbedegi 6655 áskerı bóliminde boryshtaryn ótkerip júrgen Almaty óńiriniń sarbazdary da onlaın-baılanysqa shyqty. Oqıǵa bolǵan kúni olar da bir jeńnen qol shyǵaryp, lańkesterdiń basqynshylyǵyna tabandylyqpen tótep bergen edi.
Atalmysh shara ata-analardyń sarbazdarmen baılanysynyń Qazaqstan Qarýly Kúshteri arasynda alǵash ret uıymdastyrylyp otyrǵan jańa formaty. Mundaı kezdesýler buǵan deıin Ulttyq ulannyń Qostanaı jáne Aqmola oblystaryndaǵy áskerı bólimderde ótkizilgen bolatyn. Jyldyń sońyna deıin osy tektes sharalardy QR Ulttyq ulanynyń barlyq áskerı bólimderinde ótkizý josparlanǵan.
