Astanada Qazaq gýmanıtarlyq-zań ýnıversıtetiniń túlegi Bahtıar Jamanǵaraev joǵalyp ketti, - dep habarlaıdy Qamshy.kz QazAqparatqa silteme jasap.
11 tamyz kúni 14:00 saǵat shamasynda Bahtıar Jamanǵaraev Báıterek monýmenti mańynda «Dıplomat» turǵyn-úı keshenindegi óz páterinen shyǵyp, sodan beri qaıtyp oralmaǵan. Bahtıar Astana áýejaıynan anasyn kútip alýy kerek bolǵan, alaıda sol beti áýejaıǵa jetken de joq. Kóp uzamaı, Jamanǵaraevtyń kóligi de tabyldy. Anyqtalǵanyndaı, kólik lombardqa tapsyrylǵan. Joǵalyp keterdiń aldynda Bahtıar býkmekerlik keńselerdiń birinde bás tikken, onyń qumar oıyndarǵa áýes bolǵany da belgili.
Onyń joǵalyp ketkendigi týraly habarlar Instagram men Feısbýk áleýmettik jelilerinde taratylýda.
«Kómekterińiz qajet! Jas jigit joǵalyp ketti! Aty - Bahtıar Jamanǵaraev! QazGZÝ-diń túlegi. Týǵan-týystary onymen habarlasa almaı otyrǵandaryna birneshe kúnniń júzi boldy. Qandaı da bir aqparat bolsa, myna nómirlerge habarlasýlaryńyzǵa bolady: 8771 775 04 09», - delingen týystary men dostary taratqan habarlamada.
Jamanǵaraevtyń týystary bergen málimetter boıynsha, Bahtıardyń boıy - 170-175 sm, ortasha deneli.
Astananyń İİD Bahtıar Jamanǵaraevtyń joǵalyp ketkeni týraly aqparatty rastap otyr. Polıseılerdiń habarlaýynsha, izdeý jumystary júrip jatyr.
«11 tamyzda B.Jamanǵaraevtyń joǵalyp ketkeni jóninde týystary aryz berdi. Qazirgi ýaqytta joǵalyp ketken azamatty tabý boıynsha jedel-izdestirý sharalary qolǵa alyndy. İzdeý isi qozǵaldy», - dep habarlady İİD «QazAqparat» tilshisine bergen jaýabynda.
Qazir B.Jamanǵaraevty izdeýge 200-den astam erikti qatysýda.
