10 tamyzda Almatydaǵy psıhıkalyq naýqastar ortalyǵynan qashyp, 12 tamyz kúni ustalǵan naýqastyń salafıt aǵymyn ustanatyny belgili bolyp otyr, - dep habarlaıdy Qamshy.kz.

Naýqas aýrýhanadan qashyp ketti degen kúni Almaty polıseıleri de aıaqtarynan tik turǵan kórinedi. Dereý qashqynnyń «baǵyttamasy» (orıentırovka) jer-jerlerge taratylyp, izdeý jumystary qyzý bastalyp ketken. Bul izdeý ádettegi jyndyhanadan qashqandardy izdeýge múldem uqsamaıtyny da sodan.

Sóıtsek, 1982 jyly týǵan Qanat Qojambetov esimdi naýqas tegin naýqas emes eken. Ol jaı ǵana kóp salafıttiń biri emes, 2014 jyly Óskemende jastardy teris dinı aǵymǵa tartyp, jıhadqa shaqyrǵany úshin isti bolǵan, sot qaýlysymen 100 AEK kóleminde aıyppul tólep qutylǵan, solaısha quqyqqorǵa ýorgandarynyń qyraǵy nazaryna ilikken jan kórinedi. Bul aıtylǵandardyń birazy polısıa taratqan «orıentırovkada» da kórinis tapqan.

Alaıda, polıseılerdiń aıaǵynan tik turýyna sebep bolǵan jaǵdaı bul emes basqa sıaqty. Ol ne deısiz be? Ol – Qanat Qojambetov buryn polısıada jáne UQK shekara qyzmetinde de qyzmet atqarǵandyǵy. Iaǵnı, el aýmaǵynda lańkestik qaýiptiń «sary deńgeıi» kúshinde turǵan sátte ózi salafıt, ózi psıhıkalyq naýqas, eń bastysy qarý-jaraq qoldanýdyń qyr-syryna qanyq Qanattyń emin-erkin júrýi kimdi bolsa da alańdatary anyq.

Polısıa jarıalaǵan málimetterde onyń salafıttik aǵymdy ashyq qoldaıtyny, ózin birde «Mádi», birde «Zulypqar» ataıtyny, Sham elindegi qarýly qaqtyǵystardy qoldaıtyny týraly, sozylmaly shızofrenıamen naýqastanatyn onyń májbúrlep emdeý úshin aýrýhanaǵa jatqyzylǵany aıtylady.

Abyroı bolǵanda, qaýipti naýqas kóp keshikpeı kompúter klýbtarynyń birinde polısıanyń qolyna túsken. Bostandyqta júrip eshqandaı qylmys jasap úlgermepti.