Qazaqstandyq boksshylar Á. Nıazymbetov pen I. Dychko Rıo Olımpıadasynyń fınalyna shyqty, - dep habarlaıdy Qamshy.kz.

Rıo-de-Janeıroda ótip jatqan XXXI Olımpıada oıyndarynda bokstan erler arasynda 81 kelige deıin salmaqta el namysyn qorǵap jatqan Ádilbek Nıazymbetov brıtandyq Djoshýa Býatsımen fınaldyq básekeniń joldamasyn sarapqa saldy.

Alǵashqy raýndta úsh tóreshi de Ádilbektiń jeńisine kúmán keltirgen joq. Ekinshi jáne úshinshi kezeńde Nıazymbetovtiń basymdyǵymen ótti.

Býatsı jartylaı fınalǵa deıin ýgandalyq Kennedı Katende men ózbek Elshod Rasýlov, sondaı-aq Aljır boksshysy Abdelhafıd Benshablany aıqyn basymdyqpen utqan edi. Qarsylastaryn qaıta-qaıta nokdaýnǵa túsirgen brıtandyq boksshyny býkmekerlik keńseler jartylaı fınaldyń favorıti sanaǵan edi. Alaıda Nıazymbetov óziniń osal boksshy emes ekenin dáleldeı bildi.

Aıta keteıik, Ádilbek Nıazymbetov 1/8 fınalda belarýs boksshysy Mıhaıl Dolgolevesty jáne shırek fınalda ázirbaıjandyq Teımýr Mamedovty jeńgen bolatyn. Osylaısha Nıazymbetov ekinshi ret Olımpıada oıyndarynyń fınalyna shyǵyp otyr.Londonda ol kúmis medal alǵan.

Al, el namysyn qorǵap júrgen Ivan Dychko shırek fınalda Efe Adjagbany utty.

Ivan úsh raýndta da qarsylasyna esh múmkindik bergen joq. Kezdesý tizginin alǵashqy mınýttan óz qolyna ustady. Nátıjesinde úsh tóreshi de Dychkonyń jeńisine kúmán keltirgen joq.

Ivan osynyń aldynda ázirbaıjandyq Magomedrasýl Medjıdovtan basym túsken bolatyn. Ol kezde Medjıdovtiń qabaǵy jyrtylyp, dárigerler oǵan jarysty jalǵastyrýǵa tyıym salǵan bolatyn.

Osylaısha Dychko ekinshi ret Olımpıada oıyndarynyń jartylaı fınalyna shyǵyp otyr. Budan tórt jyl buryn Londonda qola júldeger atanǵan edi.