QR Prezıdenti Nursultan Nazarbaevtyń Sochıde ótken RF basshysy Vladımır Pýtınmen kezdesýinde Reseı basshysy qazaqstandyq áriptesine Túrkıa-Reseı qarym-qatynasyn qalypqa keltirýdegi eńbegi úshin alǵys aıtty, - dep habarlaıdy Qamshy.kz Aqorda saıtyna silteme jasap.

Kezdesý barysynda memleketter basshylary ekijaqty yntymaqtastyqtyń keń aýqymdy máselelerin talqylady, sondaı-aq óńirlik jáne halyqaralyq kún tártibindegi ózekti máseleler jóninde pikir almasty.

Nursultan Nazarbaev pen Vladımır Pýtın G20, TMD memleketteri basshylarynyń keńesi jáne Qazaqstan-Reseı óńiraralyq yntymaqtastyq forýmy aıasynda ótetin aldaǵy kezdesýlerge daıyndyq barysyn qarastyrdy.

Memleket basshysy Sochı qalasyna shaqyrǵany úshin V.Pýtınge alǵys aıtyp, onyń Reseı óńirlerin damytý jolyndaǵy qajyrly eńbegin atap ótti. Nursultan Nazarbaev ekijaqty yntymaqtastyqtyń qarqynyna rızashylyǵyn bildirip, ony Qazaqstannyń ilgerilete túsýge nıetti ekenin aıtty.

– Bizdiń qarym-qatynasymyz saıası turǵydan da, ekonomıkalyq turǵydan da úlgi etýge laıyq dep sanaımyn. Osy jyldary Qazaqstan men Reseıdiń 6 myń birlesken kásiporny qurylyp, ıntegrasıamyzdyń ómirde naqty iske asqanyn kórsetti. Aldaǵy Qazaqstan-Reseı óńiraralyq yntymaqtastyq forýmyna úlken úmit artamyn. Onyń ekonomıkalyq turǵydan mańyzdy kezdesý ekenin bilemin, osyǵan oraı kóptegen jobalar ázirlenýde. Qazirgi máseleler bizdiń úkimetterimiz arqyly sheshimin tabýda. Elderimizdiń mindeti – osyndaı qıyn jaǵdaıda árdaıym birge bolý jáne bir-birimizge kómektesý. Dostyq, yntymaqtastyq men ózara kómek týraly shartqa jáne HHİ ǵasyrdaǵy tatý kórshilik pen odaqtastyq týraly shartqa negizdelgen Qazaqstan-Reseı qarym-qatynasy turaqty bolyp qala beredi. Qazaqstan men Reseı senimdi kórshi ári áriptes bolyp sanalady jáne barlyq máselelerdi órkenıetti elderdegi úlgi boıynsha sheshedi. Reseıdiń Túrkıamen qarym-qatynasy jaqsaryp kele jatqanyna qýanyshtymyn, – dedi Qazaqstan Prezıdenti.

V.Pýtın Qazaqstan Prezıdentiniń Reseı-Túrkıa qarym-qatynasyn qalypqa keltirý jolyndaǵy qaırat-jigeri úshin alǵys aıtyp, jaǵdaıdy retteýdegi bitimgerlik mısıasyn atap ótti.

– Kórip otyrǵanymyzdaı, bul qadam jemisti boldy. Biz kóptegen jyldar boıy biregeı yntymaqtastyq qarym-qatynasymyz ben ózara is-qımylymyz ornyqqan dostas Túrkıamen tolyq formattaǵy qarym-qatynasty qalypqa keltirýge rıasyz umtylys jasap otyrmyz. Túrkıa Prezıdenti R.Erdoǵannyń Reseıge sońǵy sapary ekijaqty baılanystardy qalypqa keltirý ǵana emes, ony damytý jóninde de bizdiń tolyqqandy jumys júrgizýge nıetti ekenimizdi dáleldep berdi. Sol úshin Sizge kóp rahmet, – dedi Reseı Prezıdenti.

Budan bólek, V.Pýtın Qazaqstan men Reseı arasyndaǵy strategıalyq seriktestiktiń barlyq baǵyt boıynsha tabysty damyp kele jatqanyna nazar aýdardy.

– Árıne, biz ekonomıkada qıyndyqtarǵa da kezigip turamyz, ásirese álemdik shıkizat naryǵyndaǵy turaqsyzdyq pen valútalyq aýytqý jaǵdaıynda tómendeý baıqalýda. Bul rette naqty kólemi jóninen ol sonshalyqty kóp emes – nebári 7%. Qazirgi yntymaqtastyq tetikteri bizge ony eńserýge múmkindik beredi. Al bizde mundaı tetikter tıimdi jumys isteýde, – dedi Reseı Prezıdenti.