Mádenıet jáne sport mınıstri Arystanbek Muhamedıulynyń «Fenıks» fılmin túsirýshilerden 150 myń dollar aqsha talap etkenin Qazaqstannyń Halyq ártisi Tuńǵyshbaı Jamanqulov ta rastap otyr, - dep habarlaıdy Qamshy.kz.

«Fenıks» fılmine prodúserlik etken T. Jamanqulov fılmniń túsirý jumystarynyń aıaqtalýyna A. Muhamedıulynyń el arasynda «otkat» dep atalyp ketken aqsha talap etýi kedergi boldy dep otyr.

«Jel soqpasa shóptiń basy qımyldamaıdy» degen bar. Bul áńgimeler beker aıtylyp jatqan joq. Árıne, biz eshteńeni dáleldeı almaımyz. Paraqorlar barlyǵyn oılastyryp qoıady emes pe? Biraq, bizden 150 myń dollar surady. Onyń adamy kelip, qaǵazǵa osynsha kerek dep jazyp kórsetti de, qaǵazdy jyrtyp tastady. Biz ony túsirip, úlgere almadyq. Keıin munyń bárin dáleldep júremiz dep oıladyq pa ol kezde», - deıdi T. Jamanqulov.

Túsirý tobynda qarajat bolmaǵandyqtan atalǵan soma mınıstrge jetpegen. Rejıser men prodúser mınıstrmen til tabysamyz degen áreketteri de sátsiz aıaqtalǵan. Sóıtip, kınolentany qarjylandyrý úshin mınıstr qolma qol aqsha suraǵan kórinedi.

«Biz aldymen aqshany aýdarsyn, sosyn birdeńe oılastyrarmyz dep te aıttyq. Biraq, bizge «aqshany aldymen berińder» dep talap qoıdy. Bizde aqsha bolmady, bere almadyq. Al, ol jeti aı boıy biz 150 myń dollar ákep beredi dep kútip júrdi. Barlyq daý osydan bolyp otyr», - deıdi T. Jamanqulov.

Akterdyń aıtýynsha, keıin «Fenıks» jobasyna dep memleketten josparlanǵan qarajat basqa jaqqa baǵyttalyp ketken.

«Ol bul aqshany basqa jaqqa jiberdi. Múmkin, sol jaqta oǵan suraǵanyn tólegen shyǵar. Biraq, bizde dálel joq. Biz sheneýnik, bastyq emespiz. Bizde qandaı da bir qysym jasaý, yqpal etý tetikteri de joq. Al, ol – memlekettiń adamy, oǵan bári jaǵympazdanady. Onyń sózin bári sóıleıdi, al, bizdi kez-kelgen adam qaralaı alady. Bar bolǵany biz mınıstr bolmaǵanymyz úshin», - dep ashynady T. Jamanqulov.

Al, mınıstrdiń ózi bolsa buǵan deıin eshqandaı aqsha almaǵanyn, alýǵa árekettenbegenin aıtyp aqtalǵan bolatyn. Tipti, ózine aýyr aıyp taqqan rejıser Talǵat Jánibekovti sotqa da bergen. Keıin mınıstrdiń aryzyn qaıtyp alǵany habarlandy.