Búgin Brazılıanyń Rıo-de-Janeıro qalasynda ótip jatqan Olımpıada oıyndarynyń on besinshi kúni birde-bir sportshymyz medal ala almady, - dep habarlaıdy Qamshy.kz QazAqparatqa silteme jasap.
Erkin kúres sheberleri men taekvondoshylarymyzdan qatty kútken úmitti aqtaı almady.
Alǵashqy bolyp, beldesken 86 keli salmaqtaǵy balýanymyz Asqat Kahıdze irikteý kezeńinde Belarýs balýany Omargadjı Magomedovpen beldesip, 7:11 esebimen jeńilip qaldy.
Al ekinshi balýanymyz 125 keli salmaqtaǵy Dáýlet Shabanbaı birinshi beldesýinde belarýstyq Ibragım Saıdovtan utyldy.
Sondaı-aq búgin taekvondoshylarymyz da birinen keıin biri súrindi. Tym qurysa, Olımpıadada qazaq eliniń týyn ustap shyqqan Rýslan Japarov júldege ilikse dep tilep edik. Ol da bolmady. Qola úshin aıqasynda ońtústikkoreıalyq Chha Don Mınnen 8:15 esebimen utyldy. Osylaısha, qazaq taekvondoshylary da Rıo olımpıadasyn júldesiz aıaqtady.
Sonymen qatar búgin 1000 metrge baıdarka esýden Aleksandr Emelánov, Sergeı Tokarnıskıı, Ilá Golendov jáne Andreı Ergýchev qola medal úshin ótken básekede 3 mınýt 08,715 sekýnd nátıjemen jarysty jalpy esepte 10-orynmen aıaqtady.
Áıelder arasynda 500 metrge baıdarka esýden synǵa túsken Irına Podoınıkova, Zoıa Ananchenko, Natalá Sergeeva jáne Inna Klınova atalǵan qashyqtyqty 1 mınýt 39,419 sekýndta júzip ótip, bul sportshylarymyz da jalpy esepte 10-shy orynǵa taban tiredi.
Sondaı-aq, erler arasynda zamanaýı bessaıystan óner kórsetken Pavel Iláshenko jarys jolyn 35-orynmen aıaqtady.
Eske sala keteıik, aýyr atlet Nıjat Rahımov pen júzýshi Dmıtrıı Balandın jáne 69 keli salmaqtaǵy boksshymyz Danıar Eleýsinov Rıo Olımpıadasynyń chempıony atanǵan edi. Al Rıo Olımpıadasynyń kúmis júldesin osyǵan deıin, balýan Eldos Smetov, aýyr atlet Jazıra Japparqul, boksshy Vasılıı Levıt, Ádilbek Nıazymbetov, jáne áıelder kúresinen Gúzel Manúrova jeńip aldy.
Al Otgonseseg Galbadrah, Olga Rypakova, aýyr atletter Karına Gorıcheva, Farhad Harkı, Aleksandr Zaıchıkov, Elmıra Syzdyqova, Ekaterına Larıonova, Ivan Dychko jáne Darıǵa Shákimova qola júldeger atandy.
