Brazılıanyń Rıo-de-Janeıro qalasynda XXXI jazǵy Olımpıada oıyndary aıaqtaldy. Qazaqstan jalpy komandalyq esepte 22-shi orynǵa turaqtady,- dep habarlaıdy Qamshy.kz.

Qazaqstan úsh altyn, bes kúmis, toǵyz qola medal jeńip aldy. Jalpy komandalyq esepte 22-shi oryn ıelendik. Medal sany jóninen rekord ornattyq. Buǵan deıin Atlantada 11, Sıdneıde 7, Afınyda 8, Pekınde 13, Londonda 13 medal enshilegen bolatynbyz. Bul joly qorjynǵa 17 júlde tústi.

Olımpıadanyń sońǵy kúninde eki boksshysy altyn medal alǵan Ózbekstan jalpy komandalyq esepte bizdi basyp ozyp, 21-shi orynǵa turaqtady. Ala taqıaly aǵaıyndarymyz 4 altyn, 2 kúmis, 7 qola medal jeńip alǵan.

Qazaqstannan Nıjat Rahymov, Danıar Eleýsinov, Dmıtrıı Balandın altyn alsa, Jazıra Japparqul, Eldos Smetov, Vasılıı Levıt, Ádilbek Nıazymbetov, Gúzel Manúrova kúmis medalǵa qol jetkizdi. Qola júlde alǵandardyń qatarynda Galbadrah Otgonseseg, Farhad Harkı, Karına Gorıcheva, Aleksandr Zaıchıkov, Olga Rypakova, Elmıra Syzdyqova, Ekaterına Larıonova, Ivan Dychko, Darıǵa Shákimova bar.

Aıta keteıik, osy jylǵy Olımpıada oıyndaryna 28 sport túrinen 206 memleket pen bosqyndar komandalarynan 10 myńnan astam sportshy qatysty.

Baıraqty básekede 306 medal jıyntyǵy sarapqa salyndy.

Tórtjyldyqtyń basty dodasynda elimizdiń namysyn 26 sport túrinen 104 sportshy qorǵady.

Sońǵy eki Olımpıada oıyndarynda Qytaıǵa ese jibergen AQSH bul joly qaıtadan birinshi oryndy jeńip aldy. Ekinshi orynǵa Ulybrıtanıa sportshylary ıe boldy. Úzdik úshtikti Qytaı qorytyndylady.

Jalpy komandalyq esep

1). AQSH – 121 (46 altyn, 37 kúmis, 38 qola)

2). Ulybrıtanıa – 67 (27 altyn, 23 kúmis, 17 qola)

3). Qytaı – 70 (26 altyn, 18 kúmis, 26 qola).