Qazaqstan Prezıdenti Túrkıa Respýblıkasynyń Prezıdenti Rejep Taııp Erdoǵanǵa Gazıantep qalasynda bolǵan terrorlyq aktige baılanysty kóńil aıtý jedelhatyn joldady,- dep habarlaıdy Qamshy.kz.

Jedelhatta Memleket basshysynyń Gazıantep qalasynda bolǵan terrorlyq akt saldarynan kóptegen jazyqsyz adamnyń qaza bolǵany jáne zardap shekkeni týraly habardy zor kúızelispen qabyldaǵany atap ótilgen.

«Qazaqstan terorızmniń kez kelgen túrin qatań aıyptaıdy, jazyqsyz qan tógýdi aqtaýǵa bolmaıdy dep sanaıdy. Terorızmniń tamyryna balta shabý – álemdik qoǵamdastyq úshin eń basty másele. XXI ǵasyrdyń indetine qarsy kúreste biz baýyrlas túrik halqymen birgemiz», – delingen jedelhatta.

Nursultan Nazarbaev qaıǵyǵa ortaqtasa otyryp, barsha qazaqstandyqtardyń jáne jeke óziniń atynan R.Erdoǵanǵa, qaza bolǵandardyń otbasylaryna jáne jaqyndaryna, sondaı-aq barsha túrik halqyna kóńil aıtty.

Elbasy zardap shekkenderdiń tezirek saýyǵyp ketýine tilektestik bildirdi.