Olımpıada tarıhynda tuńǵysh ret Vel Barker kýbogyn áıel boksshy ıelendi, - dep habarlaıdy Qamshy.kz AIBA (Halyqaralyq áýesqoı boks asosıasıasy) resmı saıtyna silteme jasap. 

Amerıkalyq boksshy Klaressa Shıldske Vel Barker kýbogy tabys etildi.

Eń úzdik tehnıkasy úshin osyndaı bıik marapatty ıelengen 21 jasar K.Shılds budan tórt jyl buryn Londonda birinshi ret úzdik shyqqan edi. Onda bokstan qazaqstandyq qyzdar arasynda tuńǵysh ret olımpıada júldegeri atanǵan Marına Volnovanyń jolyn jartylaı fınalda dál osy K.Shılds kesken edi. Rıoda dál osy jaǵdaı qaıtalanyp, Darıǵa Shákimova 75 kg salmaqta Klaressa Shıldske jol berdi.

Erler arasynda Vel Barker kýbogy ózbekstandyq Hasanbaı Dýsmatovqa berildi. Ol altyn júldege barar jolda qazaqstandyq Birjan Jaqypovty da jeńgen bolatyn.

Aıta keteıik, Vel Barker kýbogy úzdik boksshyǵa 1936 jyldan beri tapsyrylyp keledi. Buǵan deıin Qazaqstannan Vasılıı Jırov (1996), Baqtıar Artaev (2004) jáne Serik Sápıev (2012) Vel Barker kýbogyn ıelengen bolatyn. Bul jóninen Qazaqstan AQSH boksshylarynan keıin (olarda 5 kýbok bar) ekinshi orynda tur.