«Almaty polıseıleriniń atynan» dep joldanǵan anonımdi hattyń úzindilerin jaqynda «Radıotochka» saıty jarıalady, - dep habarlaıdy Qamshy.kz.
Redaksıa hat avtorlary (avtor jalǵyz bolýy da múmkin) Almatyda 18 shilde kúni bolǵan qyrǵynǵa baılanysty Almaty qalasy İİD bastyǵy general-maıor Serik Kúdebaevti jaýapsyz ári biliksiz, Rýslan Kúlikbaevqa qatysty dálelderdi burmalady dep aıyptaǵanyn jazady.
«Bizdiń áriptesterimizdiń qylmysker alǵashqy qylmysyn jasaǵan – áıeldi óltirgennen keıin İİD-niń barlyq jeke quramy aqparattandyrylmaǵanynan, tıisti baǵyttamalar (orıentırovka) joldanbaǵandyqtan, sonyń saldarynan qylmysker qalada emin-erkin júrip, ony ýaqytynda ustaý sharalary qoldanylmaǵandyqtan qaza bolǵanyn qansha qıyn bolsa da moıyndaımyz. İİD men Almaly AİİB kezekshi bólimi jeke quramǵa AİİB-ge shabýyl jasalǵany týraly habarlamaǵan, al, Almaly AİİB basshylyǵy qorqaqtyq tanytyp qana qoımaı, ózderiniń qylmystyq áreketsizdigin jasyrý úshin oqıǵanyń barlyq faktileri men ýaqyt tizbegin burmalady», - delingen hatta.
18 shilde kúni Almatyda bolǵan qandy qyrǵynǵa qatysty resmı málimet taraǵanda, onda qandy qylmys jasaý úshin bar bolǵany 24 mınýt ýaqyt jumsalǵany aıtylǵan bolatyn. Eldiń kúmánin týǵyzǵan da osy ýaqyt faktory edi. Al, aýdandyq polısıa basqarmasynyń ózinde bolǵan atystyń naqty qansha ýaqytqa sozylǵany týraly eshbir jerde resmı aqparat taramady. Hat avtorlary da kóptiń kóńilindegi kúdikti dóp basypty.
«Negizi R. Kúlikbaev bizdiń mınıstr esebinde aıtylǵan ýaqyttan áldeqaıda erte shabýyl jasaǵan. Aldymen ǵımaratqa kireberiste polısıa ardageri K. Satymqulovty, sosyn kúzet beketine kirip, onda turǵan polısıa qyzmetkeri M. Rahmatýllaevty atyp óltirip, qarýyn tartyp alǵan jáne taǵylymdamadan ótip júrgen polıseıdi jaralaǵan, sodan keıin baryp, jaıbaraqat AİİB ǵımaratyna kirgen», - depti hat avtorlary.
«Radıotochka» qylmystyń osy sátinde bolǵan kartınany tolyq qalpyna keltirý úshin syrtqy beınebaqylaý kameralarynyń vıdeojazbalarymen tanysý múmkindigi bolmaı otyrǵanyn jazady.
Hat avtorlary Almatynyń bas polıseıin sonymen qatar, R. Kúlikbaevtiń qolynan qaza bolǵan polıseılerdiń janazasyna barmady, jaraqat alǵan áriptesteri jatqan aýrýhanalarǵa bas suqpady dep aıyptaıdy.
«Bizdiń general tipti qaza bolǵan áriptesterdi jerleý rásimine barýǵa, Sport saraıynda ótken azamattyq janazaǵa qatysýǵa, marqumdardyń týystary men jaqyndaryna kóńil aıtýǵa, jaralanǵandardyń kóńilin surap, aýrýhanaǵa barýǵa ýaqyt tappady. Mınıstr Q. Qasymovtyń jaraqattanǵandarǵa barmaı, qaza bolǵan áriptesterdiń týystary men jaqyndaryna kóńil aıtpaı, demalysqa asyqqany ókinishti. Bul jáne İİM-niń barlyq jeke quramy qaterdiń «sary» deńgeıi jaǵdaıynda kúsheıtilgen rejımde qyzmet ótep jatqan sátte bolyp otyr», - degen hat jazýshylar.
Saıt jýrnalıseri anonımdi hat jazýshylardy anyqtaýǵa áreket etip kórgen. Alaıda, Azat Taraqov degen hat joldaýshy redaksıa saýaldaryn jaýapsyz qaldyrǵan. Anonımdi hatqa qatysty pikirin bilý úshin Almaty qalasy İİD basshysyn izdegende, onyń shynymen de qyzmettik demalysqa ketkeni, ornyna birinshi orynbasary polkovnık Qanat Taımerdenovtiń qalǵany belgili bolǵan. Q. Taımerdenov óz basshysyna qatysty hatqa qandaı da bir pikir bildirýden bas tartyp, İİM-ge habarlasýǵa keńes bergenn. Al, İİM-niń ókili Almas Sadýbaev eki kún ótken soń redaksıaǵa QR-nyń «Jeke jáne zańdy tulǵalardyń ótinishterin qaraý tártibi týraly» Zańnyń 5-babyna sáıkes, atalǵan hattyń qarastyrýǵa jatpaıtynyn habarlaǵan.
Osylaısha, shýly iske qatysty kóptegen kúdik týǵyzatyn aıyptaýlarǵa toly hattyń avtoryn anyqtaý múmkin bolmaǵan. Mundaı hattyń BAQ-qa taralýynda da mán jatyr. Zańǵa sáıkes, anonımdi habarlamalar eshbir memlekettik organda resmı túrde qaralmaıdy, zerttelip, tekserilmeıdi. Mundaı hattardan qandaı da bir nátıje kútý de orynsyz. Al, kúshtik qurylym qyzmetkerleriniń basshylyǵyna qatysty qandaı da bir resmı shaǵym jasaýy tájirıbede óte sırek kezdesedi. Sondyqtan, bul hat shynymen ujymdaǵy shalaǵaılyqtan sharshaǵan polıseılerdiń janaıqaıy ma, álde, shendi-shekpendiler arasyndaǵy qandaı da bir ishki qaqtyǵystardyń ushqyny ma, ol jaǵyn dóp basyp aıtý qıyn.
Darhan Muqantegi
