Mankent aýyldyq okrýgindegi «Rassvet» óndiristik kooperatıvi eńbek naryǵyna osydan eki jyl buryn qosylǵan-dy. Bul kooperatıv negizinen sút ónimderin qaıta óńdeýge mamandanǵan. Kooperatıv basshysy Nýsratýlla Ábdiqadyrovtyń aıtýynsha, kooperatıvtiń músheleri aldymen Túrkıadan kelgen mamandarmen birigip sútti qaıta óńdeý sehyn ashyp, jumystaryn bastaǵan eken. Dálirek aıtqanda, túrikter kooperatıvtiń bir ǵımaratyn jalǵa alyp, jumysyn dóńgeletken. Árıne, zamanaýı jabdyqtar ornatqannan keıin. Ýaqyt óte kele irimshik óndirýdiń júıesi bir yrǵaqpen jumys isteı bastaǵanda mundaı ónimder tek Shymkent qalasynyń ǵana emes, Almaty, Astana, Qaraǵandy shaharlarynyń tutynýshylaryna da keńinen málim boldy. Búginde «Rassvettiń» «Kral», «Sultan» ataýymen shyǵatyn irimshikterimen qatar súzbesin de joǵaryda atalǵan qalalardyń turǵyndary zor qyzyǵýshylyqpen satyp alady. Buǵan qosa, kooperatıv jaz kezinde aıran men ıogýrt sekildi kópshiliktiń súıikti taǵamdaryn saýda sórelerine kóptep shyǵarady.

Kooperatıv bir aýysymda 15 tonnaǵa jýyq sútti qaıta óńdeıdi. Jumys qatań básekelestik jaǵdaıynda atqarylýda. Óıtpese bolmaıdy. Sebebi, Reseıden, Qyrǵyzstannan aǵylǵan mundaı ónimder jergilikti naryqty «jaýlap» alǵan. Sondyqtan kooperatıvte aldymen shıkizat pen shyǵarylatyn ónimniń sapasyna qatań baqylaý jasalǵan. Bul mindetti zerthana meńgerýshisi S.Nájmetdınova oıdaǵydaı júzege asyryp otyr.