«Premer-mınıstr Kárim Másimovtiń júris-turysynda sońǵy kezderi bir bótendik bar. Aqordadan attap shyqpaıtyn Másimov jaz boıy oblystardy aralap júr. Barǵan jerinde rýhanı, mádenı máseleni kóteredi»,- dep jazady «Jas Alash» gazetiniń Ońtústik Qazaqstan, Jambyl oblystaryndaǵy tilshisi Ǵalymjan Elshibaı.

Premer-mınıstrdiń birneshe nókerin ertip ońtústik óńirlerge jasaǵan jumys saparynan jýrnalıs úkimet basshysynyń erekshe belsendiligin baıqaǵan sıaqty.

«Murajaılardy aralaıdy. Reseıge barǵan saparynda áriptesinen Keıki batyr men Kenesarynyń basyn suratty. Shyǵys Qazaqstanǵa jasaǵan saparynda Abaı murajaıyna arnaıy bas suqty. Almaty qalasyna barǵan kezinde Ahmet Baıtursynulynyń murajaıyna kirip, Alash arysynyń kitaptaryn jaryqqa shyǵarýǵa ýáde etti. El aralaǵysh Másimov endi áýlıe jaǵalaýǵa kóshken sıaqty.

Kárim Másimov osy aptada Ońtústik Qazaqstan oblysyna resmı issaparmen keldi. Úkimet jetekshisi Shymkentte biraz aıaldap, budan keıin Otyrar aýdanyndaǵy Arystanbab kesenesine tartty. Odan ári Túrkistandaǵy Qoja Ahmet Iassaýı kesenesine bas suqty. Jýrnalıserdi ǵımarattyń bir bólmesine qamap qo­ıyp, ózi qasyndaǵy atqaminer­lerimen arýaqtarǵa quran baǵyshtap shyqty (premer osy resmı emes sharany elden jasyrmaı-aq istese ne bolar edi deısiń). Ke­se­ne­niń qazandyq bólmesinde tu­ryp jergilikti aqsaqaldarmen tildes­ti. Qarıalar Úkimet jetek­shisine tabıǵı gaz, turǵyn úıge qatysty biraz saýaldardy qoı­dy. Bir-eki aýyz qazaqsha sóz sóılegen K.Má­simovtiń odan arǵy jaýabyn ózimen erip kelgen mınıstrler jalǵap ketti. Aqsaqaldardyń aq tilegin estip, batasyn alǵan Ká­rim Másimov osydan keıin Halyqaralyq qazaq-túrik ýnıversıte­tinde zıaly qaýym ókilderimen kezdesýge ketti... Munyń bárin nege tizip otyrmyz?

Jalpy, K.Másimovtiń osy jolǵy Túrkistanǵa jasaǵan sapary ózgesheleý boldy. Prezıdenttiń saparyn elestetedi. Úkimet basshylarynyń óńirlerge jasaǵan sapary bulaı bolmaıtyn. Prezı­dent­tik senarı. Muny bir deńiz. Ekinshiden, Másimov tý­rızm­di syltaý etip, áýlıe-ámbıe­lerdiń basyna zıarat etý úshin kelgendeı kórindi. Keıingi kezde­ri otstavkige ketedi degen Mási­mov qoldaýdy tylsym kúsh­terden surap júrgen sıaqty. Áıteýir, bir qupıanyń bary anyq. Ony búıtip áýlıe aralaýǵa ne máj­búrledi degen oı ońtús­tiktegi kópshiliktiń kókeıindegi basty saýal boldy.

Ońtústik Qazaqstan oblysyna jasaǵan issaparyn Áýlıeata jerinde jalǵastyrǵan Másimov kóne Taraz qaqpasyna kirer tustaǵy Aısha bıbi kesenesine táý etýge bardy. Qarahan baba kesenesine de arnaıy bas su­ǵyp shyqty. Osydan keıin “Kóne Taraz” mádenı-tarıhı kesheninde – ashyq aspan astynda oblystyń zıaly qaýym ókil­derimen kez­desti. Osylaısha Túrkistandaǵy senarı taǵy da qaıtalandy.

Osy kezdesýde arheologıa taqyryby erekshe talqylandy. Premer-mınıstr Mádenıet já­ne sport mınıstrligine tarıhı oryndardy zertteý boıynsha arheologıalyq jáne ǵylymı-zertteý jumystaryn jalǵastyrýdy tapsyrdy. Sonymen qatar Qar­jy mınıstrligimen birigip, 2017–2019 jyldary “Kóne Taraz” muraja­ıyn damytý úshin qarjy bólý týraly usynys daıyndaýdy jáne respýblıkalyq búdjet komısıasyna usynýdy tapsyrdy.

Al Jambyl óńirindegi jastarmen kezdesý barysynda óte ózekti máseleler kóterildi. Jastar isi jóninde vedomstvoaralyq komısıa qurý kerek degen usynysty premer jyly qabyldady.

–Mundaı komısıany qurý qajet. Oǵan ózim je­tekshilik etemin, – dep jaýap berdi.  “Kóńildi tapqyrlar klýbyna nege kel­meı­siz?” degen saýaldy da premer usynys retinde qabyldap, aldaǵy ýaqytta tap­qyrlardyń keshine baryp turýǵa ýáde etti. “Máá Má­simov...” degizip premer oryssha sóıleý jaǵy basymdaý kezdesýde jastardyń da kóńilin tabýǵa tyrys­ty», - deıdi Ǵ. Elshibaı.