Taraz qalasyndaǵy «Aýyl Bereke» bazarynda saýda jasaıtyn kásipkerler atynan jeke kásipker Jumakúl Alpysbaeva Prezıdent atyna Ashyq hat jazyp otyr, - dep habarlaıdy Qamshy.kz.
Kásipker qala basshylyǵy túrli syltaýlarmen bazardyń jumysyna kedergi keltirip otyrǵanyn aıtady. Tómende Elbasy atyna jazylǵan hat mátinin jarıalap otyrmyz.
Qazaqstan Respýblıkasynyń Prezıdenti N.Á.Nazarbaev
myrzaǵa
Asa qurmetti Nursultan Ábishuly!
Sizge qaıyrylyp otyrǵan Taraz qalasynyń turǵyny «Aýyl Bereke» bazarynyń kásipkeri Alpysbaeva Jumakúl Alimqyzy. Zeınetkermin, 2-shi Elevatornaıa 40 úıiniń turǵynymyn. Joǵaryda atalǵan «Aýyl Bereke» bazarynda kásipkerlikpen aınalasyp, kúnin kórip júrgen 3000 (úsh myń) adamnyń muń men zaryn aıtuǵa májbúr bolyp otyrmyn.
Taraz qalasynyń ortalyǵynda buryńǵy Kók bazar 2012 jyly jabylyp, oblys ákiminiń sheshimimen «Atakent», «Ortalyq bazar» jáne «Aýyl Bereke» bazarlary bolyp jeke-jeke otaý tigip, kala shetine shyǵaryldy. Biz eńbektenip otyrǵan «Aýyl Bereke» bazary buryńǵy et kombınatynyń ornyna (bos jerge aınalyp kalǵan edi) ornalasty.
Bul bazar ıesine rahmet, birinshi kúnnen kelip ornalasamyn – degen kásip ıeleriniń bárin jyly qabyldap, jaǵdaıymyzdy jasady, álide jasalýda. Buryn qańyrap bos jatqan aýmaqta búgin jan bitti. Zamanymyzǵa saı úlken saýda kesheni boı kóterdi. Búkil bazar aımaǵy qorshalyp, kúnnen, jańbyr-qardan qorǵaıtyn shatyrlar jasylynyp, júrginshiler jaǵyna plıtka tóselip, kólik joldary asfáltandy. Aýyz sý, káriz júıesi, aımaq túgel elektrlenip jaryq máselesi jáne avtobýs qatynastary túgel sheshildi.
Qurmetti Nureke!
(Bulaı jazǵanyma keshirim ótinemin. Óz aramyzda biz Sizdi osylaı ataımyz).
2014-2015 jyldary bazar aýmaǵynda jarylǵysh zat qoıyldy – dep úsh-tórt ret jalǵan aqparat taratylyp halyqty ábden dúrbeleńge saldy. Sonyń saldarynan birneshe kún bazarymyz jumys istemeı turdy. Birneshe ret qasaqana órt salý faktileri oryn aldy. Tipten, ótken jyly avtokólikke jarylǵysh zattardy toltyryp, bazardyń ortasynda jarmaq bolǵan áreketti bizdiń qyzmetkerler qyraǵalyq tanytyp úlken appatyń aldyn alyp úlgerdi. (Qudaı saqtady, eger apat oryn alǵanda qansha adam zardap sheger edi.)
Sońǵy kezde oblystyq prokýratýraǵa, SES-ke bizdiń ústimizden shaǵym túsirýshiler jıilep, sol boıynsha tekserýler kóbeıdi.
Tańqalarlyǵy sol-osy bizdiń basymyzdan ótip jatqan jaǵdaılardy oblys, qala basshylary t.b. quzyrly mekeme basshylary bile tura eshqandaı shara qoldanbaýy, bizge baqtalastyq tanytyp, jumysymyzǵa kedergi jasaýshy «Ortalyq bazar» ókilderi. Olardyń qaskóılik keltirýshi adamdary (Bazarǵa jarylǵysh zat toltyrylǵan avtomashına egeleri men oryndaýshylary da A.Sadyrbaevtyń adamdary bolyp shyqty) ony moıyndap ta otyr.
Ony az dep bazardyń jerin tartyp alamyz dep daý shyǵarýda. Osynsha eńbek etilip, shyǵyn shyǵarǵan «Aýyl Bereke» bazaryna qosymsha berilgen jerdi «memleket tarapyna qaıtarylsyn»-dep, oblys prokýrory Sybankýlov E. M. myrzanyń tapsyrmasymen qala ákimshiligi bizdi sotqa berip otyr. Osynshama qyrýar jumys ońaılyqpen atqaryla qoımaǵanyn kózi qaryqty jandar túsinse kerek. Sońǵy jyldardaǵy basymyzdan ótip jatqan keleńsiz jaılar turasynda Sizge aıtýǵa májbúr bolyp otyrmyz.
Qurmetti Nuraǵa!
Bizdiń shydamymyz shegine jetti. Ózińizden arasha suraımyz. «Aýyl Bereke» bazarynyń úsh myńdaı kásipkeriniń otbasy múshelerin esepke alsaq 15000 (on bes) bolady ekenbiz. Sol ózińizdiń 15000 (on bes myń) halqyńyzdyń atynan suraımyz!
Úlken qurmetpen:
Aryz ıesi: Alpysbaeva Jumakúl Alimqyzy
