Almaty oblysy Qarasaı aýdany Jańaturmys aýyldyq mektebiniń dırektory men muǵalimi Aıman Saǵıdýllanyń arasyndaǵy daý-damaıǵa qatysty sot otyrysy ótti, - dep habarlaıdy Qamshy.kz tilshisi sot zalynan.
Sotqa mektep muǵalimi Aıman Saǵıdýlla talap aryz túsirgen. Aryz ıesi ózin «ótken jyly mektep muǵalimderine qara jumys istetýge qarsy shyǵyp, muǵalim memlekettiń quly emes dep másele kótergeni» úshin negizsiz qýdalandym dep sanaıdy.
Onyń aıtýynsha, 2016 jyldyń 19 mamyrynda Jańaturmys mektebine Qarasaı aýdanynyń aqsaqaldary jınalys ótkizgen. Aqsaqaldar «Aıman ózine qatysy joq máselelerge aralasyp, qoǵamǵa iritki týdyryp júr» degen aıyp taǵyp otyr. Osydan keıin 2 maýsym kúni mektep basshylyǵy aqsaqaldar alqasy jınalysynda pedogogıkalyq ádep normalaryn saqtamaǵany úshin berilgen eskertýdi, tústen keıin sógisti qolyna tapsyrady. 7 maýsym kúni A. Saǵıdýllaǵa mektep dırektory Bekjan Núsipbekova tarapynan 10 akt beriledi.
Sotqa bergen aryz talabynda Aıman Saǵıdýlla 10 aktiniń jeteýin negizsiz dep tanýyn surady, sýdıa muny aldyńǵy sot otyrysynda dáıek retinde tirkegendikten qanaǵattandyrmady.
Al, jaýapker tarap mektep dırektory B. Núsipbekova pedagogtyń ádep normalaryn saqtamaǵanyn rastaıtyn kýágerler shaqyrǵan. Dırektordyń aıtýynsha, muǵalimge ádep saqtamaǵany úshin ǵana emes, memlekettiń saıasaty men basshysyna til tıgizgeni úshin sógis jarıalanǵan.
Mektep dırektorynyń hatshysy A.Murat muǵalimniń aqsaqaldar jıynynda ádep saqtamaǵanyna kýáger bolsa, mekteptiń meıirbıkesi A.Mýlıkova A. Saǵıdýllanyń memleket basshysyna til tıgizgenine kýálik etti.
Qos tarapty tyńdaǵan sýdıa Aıgúl Jańbyrbaeva aýdandyq ákimdikten eńbek kodeksin túsindirip beretin quzyrly organ men aýdandyq bilim bóliminiń ókilderin shaqyrý týraly sheshim qabyldady. Sottyń kelesi otyrysy 29 tamyzǵa qaldyryldy.
Aıta keteıik, atalmysh sotqa ádildik izdegen muǵalimdi qoldaýǵa birqatar qoǵam qaıratkerdleri men belsendiler qatysty. Sondaı-aq, A. Saǵıdýllýanyń advokaty muǵalimge qoldaý bildirgen aqyn Muhtar Shahanov pen qoǵam qaıratkeri Januzaq Ákimniń hattaryn oqyp berdi.
