Almatyda bolǵan jol-kólik apaty saldarynan bir adam kóz jumdy, - dep habarlaıdy Qamshy.kz QazAqparatqa silteme jasap.

Jol apaty Medeý aýdanynda Halıýllın men Naberejnaıa kósheleriniń qıylysynda boldy. Kýágerlerdiń aıtýynsha, Naberejnoe kóshesinde úsh er adam Nissan Terrano markaly avtokóliginen tańqýraı salynǵan jáshikterdi «GAZel» kóligine artyp jatqan. Osy sátte Halıýllın kóshesinen úlken jyldamdyqpen shyǵa kelgen jol talǵamaıtyn Range Rover avtokóliginiń júrgizýshisi basqarýǵa ıe bola almaı, Nissan kóligine baryp soǵylady.

Soqqy saldarynan Nissan kóligi «GAZel» kóligine, al «GAZel» qasynda turǵan Daewoo Matiz jeńilavtokóligine baryp soǵyldy.

Apat saldarynan «GAZel» kóliginiń júrgizýshisi oqıǵa ornynda kóz jumdy. Taǵy bir adam eki aıaǵy synyp, aýrýhanaǵa jetkizildi.