Qazaqstandyq tanymal saıasattanýshy, Prezıdent janyndaǵy strategıalyq zertteýler ınstıtýtynyń dırektory Erlan Qarın: «Ózbekstan prezıdenti Islam Kárimovtiń densaýlyq jaǵdaıy týraly aqparattyń ashyq taraýyna el el bıligi amalsyzdan jol berdi», - dep jazady óziniń Feısbýktegi paraqshasynda.

«Bul amalsyzdan jasalǵan qadam. Birneshe kúnnen soń Ózbekstan úshin eń mańyzdy meıramdardyń biri – Táýelsizdik kúni atap ótiledi. Barlyq postkeńestik elder úshin bul – 25 jyldyq mereıtoı. Al, sol kúni prezıdenttiń merekelik sharalarǵa qatyspaǵany baıqalyp qalar edi. Onyń ústine ol olıpıadashylardy qurmetteý rásiminde bolmady. Sondyqtan, Ózbekstan bıligi el arasynda túrli sybys taramaýy úshin prezıdenttiń densaýlyq jaǵdaıy týraly osyndaı habarlama jasaý týraly sheshim qabyldaýy múmkin», - deıdi E. Qarın.

Saıasattanýshy birqatar zertteý ortalyqtarynyń ózbek basshysynyń jaǵdaıyna qatysty pikir bildirip, el bolashaǵy týraly san alýan boljam jasap jatqanyn da aıtady.

«Qazir bul jaǵdaıdy san túrli túsindirýge bolady. Buryn da ózbek jetekshisiniń densaýlyq jaǵdaıy týraly sybystar bolǵan. Shamamen ár eki jyl saıyn osyndaı jaǵdaılar oryn alyp, prezıdent ár joly óziniń aqparat alańynan joǵalyp ketý sebebin tikeleı túsindirmese de, sybystardy janama joldarmen joqqa shyǵaratyn. Halyqtyq meıramdardyń birinde Karımovtyń el aldyna shyǵyp, ártistermen birge bılegenin eske túsirińiz», - deıdi ol.

Saıasattanýshynyń oıynsha Ózbekstan bıligi taratqan habar sarapshylardyń bıliktiń kelesi adamǵa berilýi týraly boljamdar jasaýyna sebep bolǵan.

«Birqatar reseılik resýrstar osy qazirdiń ózinde murager tańdaldy dep habarlap, onyń tulǵasyna minezdeme berýde. Biraq, meniń oıymsha, qazir ne bolatynyn dál boljaý qıyn. Onyń ústine, osy taqylettes oqıǵalar bolǵan elderde jaǵdaı zań normalarynda, saıası damý normalarynda kórsetilgendeı órbimegenin kórdik», - deıdi E. Qarın.

Soǵan qaramastan, E. Qarın ózbek bıligi kútpegen senarıler men oqıǵalarǵa daıyn ekenin aıtady.

«Shamasy mundaı senarıler buryn da synalǵan sıaqty. Óıtkeni, 2011 jyly Ózbekstan konstıtýsıasyna birqatar ózgerister engizilgen edi. Olardyń bireýi túrli fors-majorlyq jaǵdaıda prezıdenttiń mindetin atqarýǵa qatysty. Buǵan deıin konstıtýsıada qandaı da bir jaǵdaı bola qalsa, prezıdenttiń ýákilettiligi depýtattardyń birine beriledi degen sıaqty túsiniksiz sóılemder bolatyn. Biraq, keıin engen ózgeristerde bul norma naqtylanyp, prezıdent ókilettiligi men mindetteri Senat tóraǵasyna ýaqytsha artylatyny, úsh aı ishinde zańǵa sáıkes jańak saılaý ótkiziletini jazyldy», - deıdi saıasattanýshy.

Alaıda, saıasattanýshy áli kúnge kórshi el konstıtýsıasynda prezıdent ókilettiliginiń merziminen buryn toqtatylý máselesi naqtylanbaǵanyn alǵa tartady.

«Eger aımaqtyń basqa elderinde prezıdent ókilettiligin onyń densaýlyq jaǵdaıyna nemese óz erkimen otstavkaǵa ketýine baılanysty merziminen buryn toqtatý týraly aıtylsa, Ózbekstannyń negizgi zańynda ol másele túsiniksiz – óz mindetterin atqarý múmkin bolmaǵan jaǵdaıda dep jazylǵan», - deıdi E. Qarın.

Saıasattanýshy aımaqtyq saıasatta yqpaldy ról ıelenetin Ózbekstan basshysynyń densaýlyq jaǵdaıy eldiń ishki turaqtylyǵy men bolashaqtaǵy qalypty damýyna qandaı da bir qater tóndirmeıtinin aıtady.

«Oqıǵa qalaı órbise de, belgili bir kúshti dástúrlerge, tártip normalaryna negizdelgen ózbek saıasatynyń artyqshylyqtaryn esten shyǵarmaý qajet. Sondyqtan da, bul eldiń joly qandaı jaǵdaı bolsa da saqtalady. Árıne, asa qýatty emes syrtqy aralasýlardyń oryn alatyny da jasyryn emes», - deıdi E. Qarın.

Esterińizge salsaq, keshe Ózbekstandy 27 jyldan beri basqaryp kele jatqan 78 jastaǵy Islam Kárimovtiń ınsýlt alyp, aýrýhanaǵa túskeni týraly habar tarady. El bıligi osylaısha memleket basshysynyń densaýlyq jaǵdaıynyń syr bergenin alǵash ret ashyq túrde moıyndap otyr.

1 qyrkúıek kúni Ózbekstan Respýblıkasy KSRO-dan táýelsizdik alǵanyna 25 jyl tolǵanyn atap ótedi.