Bizdiń aýylda Erden (esimi belgili sebeptermen ózgertildi) degen sportshy bolǵan. Keńes Úkimeti kezinde ulttyq sporttan respýblıkalyq jarystarda jeńip júrgen elge belgili adam eken. Jas kezinde at qulaǵynda erkin oınaǵan aqsaqaldyń ómirinde bir úlken ókinish bar kórinedi. Ony sol Erden atanyń óz aýzynan estigen ájem aıtyp edi.

Keńes Úkimeti kezinde jezóksheler úıi, jezóksheler uıashyǵy, jalpy jezókshe degen uǵym qazirgideı keń taralmaǵan edi ǵoı. Tek erkekterdiń keıbir joldasy joq áıelderge baratyny bolmasa, otbasy qúndylyqtary berik saqtalǵan kezeń  emes pe edi? Erden ózi palýan, ózi shymyr, kelisti jigit, búkil aýyl syılaıtyn azamat edi. Biraq ol sol aýlydaǵy bir jalǵyz basty, el «buzylǵan qatyn» atap ketken Baǵıla degen áıelge barady eken keıde.

Birde Erden sporttyq jarystan jeńip, búkil odaqtyq jarysqa baratyn bolypty. Jarys odaqtas respýblıkalardyń birinde ótedi eken. Sodan odaqtyq jarysqa baratynyna masattanǵan soń ba, nege ekeni Erden jolǵa shyǵatyn kúni Baǵılanyń úıine túnepti. Alys jolǵa sol Baǵılanyń úıinen attanypty. Sonymen ne kerek, taýly respýblıkalardyń birinde ótken búkil odaqtyq jarysta Erden qarsylasynan ońbaı jeńiledi. Onymen qoımaı, elge eńsesi túsip, birtúrli bop oralady. Sodan keıin Erdenniń sporttaǵy joly júrmeıdi. Kezdesken qarsylastyń bárinen jeńile beredi. Sóıtip, sportty birjolata tastaǵan eken.

«Qaraqtarym, otbasy tazalyǵyn saqtańdar. Jarlaryńa adal bolyńdar. Men ómirimde úlken qatelik jasadym. Jarysqa bararda buzylǵan áıeldiń úıine túnep, sodan jolym baılandy. Odan keıin qansha talpynsam da sporttaǵy jolym júrmeı qoıdy. Er adam jeke bas tazalyǵyn saqtap júrý kerek» dep, qartaıǵan shaǵynda bata surap barǵan jas jigitterge ósıet etip aıtyp otyrady deıdi, Erden aqsaqal...

Aıǵanym Birtýar