Almatynyń Alǵabas yqsham aýdanyndaǵy №148 úıdiń turǵyndary óz páterlerin bosatty, - dep habarlaıdy Qamshy.kz 24.kz - ke silteme jasap.
Adamdardyń biraz bóligi keshe kóship ketken. Qalǵandary júkterin búgin alyp ketti. Qalalyq qurylys basqarmasynyń ókilderi úıdiń irgetasy bekitiletinin málimdedi.
Bul balaqaıdyń endi basqa aýlada oınaýyna týra keledi. Qurylysshylar tańerteńnen bastap átkenshekter men syrǵanaqtardy buzýǵa kiristi. Birneshe aı buryn baspana alyp, páterlerin jıhaz jáne turmystyq tehnıkamen jabdyqtaǵan turǵyndar da sol zattardy qaıta shyǵaryp álek.
- Ýaqytsha páter jaldap turýǵa májbúr bolyp otyrmyz. Men páter tappadym. Júkterimdi páter jaldap turyp jatqan kórshilerime qoıamyn, al ózim qaladan 1 bólmeli páter jaldap turaıyn dep jatyrmyn. Oǵan eki aıǵa 50 myńnan 100 myń teńge qolyma berdi. Ótemaqy berdi, - deıdi Alǵabas-6 yqsham aýdanynyń turǵyny Aıgúl Baızaqova.
№148 úıde turǵan otbasylardyń birqataryna Saıaly yqsham aýdanynan turaqty túrde páter berilgen. Keıbireýleri sol Alǵabas yqsham aýdanyndaǵy basqa úıge jaıǵastyrylǵan. Al taǵy birneshe otbasyǵa qaladan ýaqytsha páter jaldap turýǵa ótemaqy tólendi.
- Jer asty sýlarynyń kóterilgenine baılanysty, topyraqtyń quramynyń ylǵaldanýyna baılanysty shekten tys ylǵaldanýyna baılanysty bul jerde túpkilikti bekitý jumystaryn qajet etedi. Sondyqtan bul jerde arnaıy úlken tehnıkalar jumys isteıtin bolady, - deıdi qalalyq qurylys basqarmasynyń basshysy Muhammedǵárip Qurmanǵalıev.
Jalpy Alǵabas-6 yqsham aýdanynda otyzǵa jýyq toǵyz qabatty úı bar. Qurylys basqarmasynyń basshysy solardyń barlyǵynyń irgetasy bekitiletinin málimdedi. Onyń ishinde toǵyz ǵımaratta jumys shuǵyl bastalady.
- Mamandandyrylǵan ınstıtýttardyń qorytyndylaryna baılanysty shekten shyqpaıtyn aýytqýlar bar osy 9 úıde. Qalǵan úılerdi ekinshi kezekte biz aýytqýy bolsyn-bolmasyn bárin bekitýin jasap shyǵamyz, - deıdi qalalyq qurylys basqarmasynyń basshysy Muhammedǵárip Qurmanǵalıev.
Al 148-úıdiń irgetasyn bekitýge ákimdik ókilderi eki aı ýaqyt ketedi dep otyr. Biraq turǵyndardyń osy úıge qaıta oralatyny ázirge belgisiz.
- Álternatıvti turǵyn úı retinde dál osy Alǵabas-6 shaǵyn aýdanyndaǵy 133-úıdiń de qurylystary aıaqtalyp, sol jerge de kóshirilýge de múmkindigi bolady. Iaǵnı bitkennen keıin turǵyndar 133-úıdi tańdaıdy, ne bolmasa óziniń myna qalpyna keltirilgen úıdi tańdaıtyn bolady, - deıdi Qurmanǵalıev.
Sondaı-aq Alǵabas-6 yqsham aýdandaǵy aryq júıesi de tolyǵymen kúsheıtiledi. Onsyz eńbektiń esh ketýi ábden múmkin.
