Saıasattanýshy Ázimbaı Ǵalı Ózbekstandaǵy jaǵdaıdyń budan ary qaraıǵy órbýine qatysty oılarymen bólisti, - dep habarlaıdy Qamshy.kz.

«Islam Karımov ólgen soń tepe-teńdik saqtalmaıdy. Atalǵan personalardyń bir-ekeýi tura kóteriledi, olardy shetinen qamaı bastaıdy. Halyq kóshege shyǵady, biraq iri qalalarda jastar sherýin osy joly atýǵa ásker bata almaıdy. Táshken men Samarqan, Ferǵana ǵana emes, onyń ústine daǵdarys kúsheıip tur, halyq sharshaǵanyn aıtady», - dep jazady ol.

Á. Ǵalı el basshylyǵyna I. Kárimovtiń qyzy L. Kárimova-Tılláeva kelgenimen, ol eldegi turaqtylyqtyń saqtalýyna kepil bola almaıtynyn aıtady.

«Ózbekstannyń qazirgi zaman tarıhynda jańa kezeńi bastaldy deı ber. Bılikke kelesi dıktator kelý kerek edi, áıtpese dúrbeleń kezeńi bastalady. Biraq Lola bılikti Ózbekstanda ustaı almaıdy. Eki-úsh aıdyń ishinde bılikti qaıta bólisý bastalady. Bul kúreske Táshken men Samarqannyń stýdentteri men eresek oqýshylary da qatysady. Lola tek ótpeli kezeńde bıliktiń basynda turýshy. Basqarý vertıkali bosańsı bastaıdy. Ekonomıkalyq jáne áleýmettik keleńsizdikter betke, kóshege shyǵady. Islam Kárımovtyń kezinde jaǵdaıymyz nashar boldy deıdi kópshilik sózi: bul Lola ketsin degen sóz», - deıdi ol.

Saıasattanýshy eldegi shıeleniske naryqtyq qatynastardyń ádil prınsıpteri ornamaǵandyǵy sebep bolatynyn aıtady.

«Ózbekstanda naryqtyq qatynastar jetkiliksiz kólemde engen. Lıberaldyq erkindik tipti az. Ákimshilik shekteý kóp. Qyshlaqtan qalaǵa, Samarqanǵa, Tashkenge kóshý, barý, turý úlken qıyndyq týǵyzady. Reseıge ketý qıyn, Reseıden kelseń tonaıdy. Osydan bylaı Halyq korrýpsıamen kúresýdi tý ǵyp kóteredi. Birneshe korrýpsıaner famılıalary atalady.Koreıler men orystar Ózbekstannan qashady. Bizdi ımıgrasıalyq rejım qatańdaý kerek. Tek oralman qazaqty qabyldaý kerek», - deıdi Á. Ǵalı.