Ulttyq qaýipsizdik komıteti 12-30 tamyz aralyǵynda Aqtóbe jáne Batys Qazaqstan oblystary aýmaǵynda úsh radıkaldy toptyń is-áreketterine tosqaýyl qoıdy, - dep habarlaıdy Qamshy.kz komıtettiń baspasóz qyzmetine silteme jasap.

Nátıjesinde radıkaldardyń quqyq qorǵaý qyzmetkerlerine shabýyldar jasaý, sondaı-aq halyq kóp shoǵyrlanatyn oryndarda terorızm aktileriniń jasaý josparlaryn iske asyrý nıetteri buzylǵan.

«Top músheleriniń turǵylyqty mekenjaılaryn tintý barysynda birneshe atys qarýy jáne oǵan qajetti oq-dáriler, trotıl, qoldan jasalǵan jarylǵysh zat, sýyq qarý, ekstremıstik mazmundaǵy baspa jáne aýdıo materıaldar, halyqaralyq terorıstik uıymdardyń tólbelgileri alyndy.

Buǵan qosa, top músheleriniń birinen óz is-áreketterin qarjylandyrý maqsatynda teńgelik jalǵan aqshalar, arnaıy qaǵaz, kompúterlik jáne kóbeıtý tehnıkasy tabyldy», - delingen baspasóz habarlamasynda.

UQK «Kórsetilgen top múshelerine qatysty QR Qylmystyq kodeksiniń 174 («Áleýmettik, ulttyq, rýlyq, násildik,tektik-toptyq nemese dinı alaýyzdyqty qozdyrý»), 256 («Terorızmdi nasıhattaý nemese terorızm aktisinjasaýǵa jarıa túrde shaqyrý»), 257 («Terorıstik top qurý jáne onyń qyzmetine qatysý»), 231 («Jalǵan aqsha nemese baǵaly qaǵazdar jasaý, saqtaý, alyp ótý nemese ótkizý»), 287 («Qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrý»), 288 («Qarýdy zańsyz jasaý») baptary boıynsha sotqa deıingi tergeý sharalary» júrgizilip jatqanyn habarlady.

Sot sanksıasyna sáıkes Batys Qazaqstan oblysynyń 10 turǵyny jáne Aqtóbe oblysynyń 11 turǵyny qamaýǵa alynǵan. Qazir tergeý amaldary jalǵasýda.  

Buǵan deıin UQK lańkestik áreket jasamaq boldy degen kúdikpen Almaty oblysy aýmaǵynda da radıkaldyq toptyń tórt múshesin ustaǵan bolatyn.