AQSH Prezıdenttiginen úmitker Donald Tramp óziniń medısınalyq kartasyn jarıalaýǵa daıyn ekendigin málimdedi. Ol qarsylasy Hılları Klıntonǵa  densaýlyǵy týraly tolyq aqparatty kópshilikke jarıalaýdy usyndy. Bul týraly «Segodná. ua» habarlaıdy.

«Menińshe, eki úmitker, ádiletsiz Hılları de, men de medısınalyq kartamyzdy jarıalaýymyz kerek. Men buny ońaı isteımin. Al sen she, Hılları?» dep jazdy "Tvıtterdegi" paraqshasynda Tramp. Buǵan deıin Tramptyń dárigeri Garold Bornstaın Prezıdent taǵynan úmitkerdiń densaýlyǵy durys ekenin aıtqan bolatyn.   

Soltústik Vırdjınıa men Merılend shtattaryndaǵy Tramp kampanıasynyń dırektory Djon Djaggers Klıntonnyń halyq aldyna qalyń kıimmen shyǵýyna nazar aýdaryp, «Sizder tamyz aıynda júnnen toqylǵan pıdjak kıer me edińiz? AQSH Prezıdenti bolǵysy keletin áıel ár sharaǵa júnnen toqylǵan pıdjak kıip keledi» deı kele, «Bul áıel qatty aýyrady jáne olar bunysyn jasyrýǵa tyrysýda» dedi ol.

Klıntonnyń qarsylastary onyń densaýlyǵy týraly burynnan aıtyp keledi. Bul sybysty joqqa shyǵarý úshin demokrattardyń atynan saılaýǵa túsip otyrǵan kandıdattyń shtaby shildeniń sońynda Klıntonnyń densaýlyǵy tolyq jaqsy ekenin dáleldeý úshin medısınalyq tekserý málimetterin jarıalaǵan bolatyn.