Búgin Qazaqstan musylmandary dinı basqarmasynyń tóraǵasy Erjan qajy Malǵajyuly Elordada «Nur Astana» medresesiniń shákirtterine dástúrli dárisin oqydy, - dep habarlaıdy Qamshy.kz QMDB baspasóz qyzmetine silteme jasap.

Bas múftı bolashaq din qyzmetkerlerine qazirgi zamanǵy dinı máselelerge baılanysty pátýa berýdiń ádis-tásilderi men júıeleri týraly jan-jaqty túsindirip berdi. QMDB tóraǵasy árbir máselege tereńnen úńilip, ony jan-jaqty saralap, Islam álemindegi tańdaýly pátýalardy negizge alǵannan keıin sharıǵı úkim shyǵarýdyń qajettigin sóz etti. Atap aıtqanda, neke, talaq berý, taǵdyr máselesi týraly dáris oqyldy.

«Sizder keshegi medreseden tálim alyp, álemge tanylǵan Abaı, Beıimbet, Mirjaqyp syndy babalarymyzdyń baqytty urpaǵysyzdar. Árbir ýaqyttaryńyzdy tıimdi paıdalanyp, tereń bilim alýǵa talpynyńyzdar. Múftıatqa ózderińiz sekildi bilimdi dinı qyzmetkerler qajet. Saýatty, tájirıbeli kadr qaı kezde bolsyn kez-kelgen máseleni sheshedi», – dep atap ótti Bas mıftı Erjan qajy Malǵajyuly.

Bas múftı dárisine jalpy sany 122 shákirt qatysty.