Birneshe kúnnen beri "Ańyz adam" tóńiregi dý-dý boldy. Ekige jarylǵan azamattardyń pikirlerin oqyp otyryp biraz suraq týyndady:
1. Adamzattyń qarǵysyna ushyraǵan qanisherler, tarıhta qarabet bolyp qalǵandar "ańyzǵa aınalǵan adam" degenge laıyq pa? 
2. Eger túpki maqsat Pýtınniń qanquıly áreketterin áshkerleý bolsa nege muqabaǵa sonyń Pýtler degen kollajyn basyp, oı ashyq aıtylmady? Kúlli Eýropa solaı istedi ǵoı... (Pýtınniń fashıske aınalǵanyn qazir barlyq basylymdar jazyp jatyr. Sondyqtan másele tek sonda degenge senińkiremeımin) 
3. Biz ADAM men NADANNYŃ ara-jigin ajyratýdan qalǵanbyz ba? 
4. Reseı fashızmine qarsy aýyz asha almaıtyn qazaq sheneýnikteri nege belsendi bola qaldy? Eger Qazaqstan Úkimeti fashızmmen talmaı kúresip kele jatqan "Qaharman" bolsa bir ıgi... Shalys basqan Bas redaktordy 12 jylǵa sottatamyz deý "ózgege áli kelmegen beıbaq óz balasyn ońdyrmaı sabaıdy"nyń keri sekildi. Aıyppuldan asar aıyp kórip turǵan joqpyn. 
5. "Gıtler -fashıst emes" degenderdi qorǵasam, eń áýeli ákemniń Ekinshi dúnıe júzilik soǵysta opat bolǵan qos aǵasynyń árýaǵy atady, ekinshiden bul durys emes. Al qoldamasań qazaqtyń taralymy kóp bir basylymyna qater tóndi. Bundaı ekiudaı pikirge ushyraǵan men ǵana ma? 
6. "Maqala avtorynyń pikiri redaksıa ustanymyn bildirmeıdi" degen jaqsy árıne, biraq, ishki oı-sana senzýrasy qaıda qalady? 
7. Gıtler men Stalındi salystyra daýlasyp, "Gıtler adamdy az óltirgen" degen ne sóz? Osyndaı pikirler órip júr. Bir adam óltirse de qylmyskerdiń aty qylmysker emes pe... Jer jahandaǵy 80 mlndaı adamdy joıǵan (Gıtler 37 mln. Stalın. 40 mln) eki eserdiń "anaýsy jaqsy" deý bizdiń oı-órisimizden habar bermeı me? 
8. Sóz joq "Ańyz adam" qazaq baspasóziniń óńgelermen básekeles bola alatynyn dáleldedi. Qazaqy BAQ shatqaıaqtap ázer júrgen ýaqytta ár basylym biz úshin qymbat. "Ańyz adam" bizge KEREK! Biraq bolashaqta atyna laıyq naǵyz ADAMDARDY ǵana bassa....