Qazaqstandyq zańgerdiń shaǵymy boıynsha Reseıdiń Tergeý komıteti Vladımır Jırınovskııge qatysty tekserý júrgizedi, - dep habarlaıdy Tengrinews.kz tilshisi quqyq qorǵaýshy Asqar Qaımaqovtyń ózine silteme jasap.

Jırınovskııdi Reseıdegi Otan qorǵaýshy kúnine arnalǵan mıtıńte sóılegen sózi úshin qylmystyq jaýapkershilikke tartýdy suraǵan qazaqstandyqtyń haty aqpan aıynyń sońynda joldanǵan. Eki aıdan soń zańgerge "shaǵymyńyz tergeýaldy tekserý júrgizý úshin Reseıdiń Tergeý komıtetine joldandy" delingen jaýap keldi.

Qaımaqov Jırınovskıı óziniń atyshýly málimdemesi úshin RF Qylmystyq kodeksiniń úsh baby boıynsha jazalanýy kerek dep esepteıdi: "Jekkórinishti nemese jaýlasýdy týǵyzý jáne adamnyń ar-ojdanyn qorlaý", "Kópshilikti ekstremıstik qyzmetke shaqyrý", jáne "Kópshilikti basqynshylyq soǵysty órshitýge shaqyrý". Zańgerdiń aıtýynsha, óz sózinde Jırınovskıı Qazaqstandy ǵana emes, ózge elderdi de, sonyń ishinde, Ýkraınany da kemsitti.

Eske salaıyq, bul málimdeme Ortaazıalyq federaldyq okrýg qurý týraly bolatyn. Reseıde Otan qorǵaýshy kúnine arnalǵan mıtıń kezinde LDPR jetekshisi "Orta Azıada eshqandaı respýblıka bolǵan joq. Ortaazıalyq federaldyq okrýg boldy, basty qalasy - Vernyı! Qazir qalanyń ataýy basqa, Alma-Ata - meniń týǵan qalam. Ony oılap tapqan Ózbekstan, Qyrǵyzstan, Tájikstan, Túrikmenstan men Qazaqstan. Ortaazıalyq federaldyq okrýg!" - degen bolatyn Jırınovskıı.

QR Syrtqy ister mınıstrligi bul pikirge baılanysty Reseıdiń syrtqy saıasat vedomstvosyna nota joldady. Keıin RF Federaldyq Jınalysynyń Memlekettik Dýmasy apparaty jetekshisiniń orynbasary Iýrıı Shývalov keıbir saıasatkerlerdiń mundaı pikirleriniń Reseı men Qazaqstan arasyndaǵy qatynastarǵa eshqandaı áser etpeıtinin málimdedi. tengrinews.kz