«Ulttyq baspasóz klýby» qoǵamdyq birlestigi óziniń qyzmetiniń qunyn kóterip jiberdi,- dep habarlady «Mataevtar isi» boıynsha sot otyrysynda onlaın-kórsetilim boıynsha sotqa túsinik bergen kýáger – «Qazaqtelekom» AQ-nyń buqaramen baılanys jónindegi basqarmasynyń menedjeri Mádına Shilikbaeva. Onyń aıtýynsha, buqaralyq aqparat quraldarynyń barlyǵy memlekettik satyp alý sharty jasalmaı turyp, «Qazaqtelekom» AQ-nyń qyzmeti týraly aqparattyq-jarnamalyq materıaldardy jarıalaýǵa kelisimin bergen. Kýáger «Ulttyq baspasóz klýby» qoǵamdyq birlestiginiń qyzmet kórsetý qunyn ádeıi kóterip jibergenin ashyq aıtty.
«2013 jyly men «Qazaqtelekom» AQ-nyń jarnamalyq materıaldary «Vremá» gazetinde jarıalanǵanyna kóz jetkizý úshin, atalǵan gazettiń qyzmetkerlerimen telefon arqyly habarlastym. Men olarǵa ótinish jasap, «Qazaqtelekom» týraly mateıaldardyń barlyǵyn ózimniń elektrondyq poshtama jiberýlerin suradym. Olar meniń elektrondyq poshtama tablısa jiberdi. Osy tablısada gazettiń nómiri, jarıalanǵan materıaldardyń kólemi, jarnamalyq-aqparattyq materıaldardyń bir sharshy metriniń quny jóninde málimetter boldy. Meniń baıqaǵanym, tablısadaǵy baǵa memlekettik satyp alý shartynyń qosymshasyndaǵy baǵadan kem boldy»,- dep áńgimeledi kýáger M. Shilikbaeva.
Ol sotqa bergen jaýabynda birqatar jaıttardyń basyn ashty. Máselen, Mádına Shilikbaeva ártúrli basylymdarǵa telefon arqyly habarlasyp, olarǵa jarnamalyq-aqparattyq materıaldardy jarıalaýǵa ótinish jasaıdy. Menedjer memlekettik satyp alý tenderiniń áli ótkizilmegenin, ıaǵnı ol ótkennen keıin, tenderdi utyp alǵan tulǵanyń barlyq qyzmetterdiń aqysyn tóleıtinin aıtady. Atap aıtarlyǵy, buqaralyq aqparat quraldarynyń barlyǵy osy talapqa birden kelisimin bergen. Nátıjesinde «Qazaqtelekom» týraly materıaldar jaryqqa shyǵady.
Mádına Shilikbaevanyń sot otyrysyndaǵy túsinigin óziniń áriptesi, «Qazaqtelekom» AQ-nyń buqaramen baılanys jónindegi basqarmasynyń taǵy bir menedjeri Záýre Qazybaeva da rastady. Ol «Ulttyq baspasóz klýby» belgilegen baǵa baspa BAQ-tardyń praıs-paraǵyndaǵy baǵamen salystyrǵanda joǵary ekenin kórip, bul týraly «Qazaqtelekom» AQ-nyń buqaramen baılanys jónindegi basqarmasynyń jetekshisi Iýlıa Isakovany habardar etedi. «Men sharttyń jobasyn daıyndaý kezinde «Ulttyq baspasóz klýby» qoǵamdyq birlestigi usynǵan baǵany kórsettim. Sonymen qatar, Ulttyq baspasóz klýby belgilegen baǵa baspa BAQ-tardyń praıs-paraǵyndaǵy baǵamen salystyrǵanda joǵary ekenin Iý. Isakovaǵa aıttym»,-dedi Záýre Qazybaeva.
Aıta ketelik, buǵan deıingi sot otyrystarynyń birinde túsinik bergen «Qazaqtelekom» AQ-nyń strategıalyq basqarý jónindegi bas dırektory Batyr Mahanbetajıev memlekettik satyp alý erejeleri boıynsha qosalqy merdigerlikke berýdi yqshamdaý qajettigin aldyn ala bilse de, Seıitqazy Mataevtyń usynysymen keliskenin habarlady. Sóıtip ol óz qyzmetkerlerine tenderlik qujattardy belgilengen tártipke sáıkes daıyndaýǵa S. Mataevqa qol ushyn sozýǵa tapsyrma beredi. Tergeý barysynda anyqtalǵandaı, «Ulttyq baspasóz klýby» qoǵamdyq birlestiginiń prezıdenti Seıitqazy Mataev basylymdarǵa jarnamalyq materıaldar shyǵarý boıynsha kórsetiletin qyzmetterdiń qunyn kóterip jibirgen. Sóıtip kóterilgen baǵanyń aıyrmasynan túsken qarajatty qolma-qol aqshaǵa aınaldyryp, óziniń jeke qajettilikterine jaratqan.
Tergeýdiń nusqasy boıynsha, «Ulttyq baspasóz klýby» qoǵamdyq birlestiginiń prezıdenti Seıitqazy Mataev 2011-2013 jyldar aralyǵynda qyzmet túrleriniń qunyn kóterý jolymen «Qazaqtelekom» AQ-na jarnamalyq-aqparattyq materıaldardy ornalastyrýǵa bólingen 398 mln. teńgeniń 143 mln-yn urlaǵan.
Ámirlan Álimjan
