Keshe Almatydaǵy Músirepov atyndaǵy akademıalyq balalar men jastar teatrynda «Dúldúl án men pyraq kúı» atty dástúrli mýzyka óneri keshi bolyp ótti. Keshti «Adyrna» ulttyq etnografıalyq birlestigi uıymdastyrdy. Bıylǵy jyl jylqy jyly. Aty aıtyp turǵandaı konsert ár zamandarda ultymyzdyń jylqyǵa arnalǵan án – kúıimen órbidi. Jylqy qazaqtyń qanaty bolǵan. Ultymyz ánmen ardaqtap, kúımen taıpaltqan jylqy maly baǵzy zamandardan batyrlar serigi, halyq dosy. Kesh barsynda babalardyń mingen tulpar dúbiri qaıta jańǵyryp, ónerpazdardyń quıqyljyta salǵan ánimen, kúmbirlete tókken kúıimen aspanǵa qalyqtady. Dombyranyń úni, sybyzǵynyń sazy qosylyp, sal serilerdiń áni áýeleı shyrqalǵan da zalda rýhtanbaǵan kórermen qalmady. Keshte Uljan Baıbosynova, Aıgúl Úlkenbaeva, Abzal Qýanyshuly, Talǵat Muqysh syndy Qazaqstannyń eńbek sińirgen ártisterimen qatar oqý ordalaryndaǵy bir top jas ónerpazdar óner kórsetti. Keshti belgili ónertanýshy Erlan Tóleýtaı júrgizdi. Birjan saldyń «býyrltaıy», «eki jıreni», Kenenniń «kóksholaq» áni shyrqalǵanda, «boz aıǵyr» kúıleri shertilgende sahnada tulparlar kisinep ótkendeı boldy. Kesh kórermeni bolǵan Jýrnalıs Ásıa Baǵdaýletqyzy konsertten alǵan áserin jasyrmaı «Facebook» jelisindegi paraqshasyna bylaı dep jazdy: «Taqyryp qandaı. Jylqy degen qazaqtyń jany eken ǵoı. Imanjúsiptiń azamattyǵy, Birjan saldyń saltanaty, Aqan seriniń zar - muńy, Kenen men Jaıaý Musanyń qarsylyǵy, Sákenniń seriligi Jylqymen birge órilipti-aý... Bir Erkin Shúkiman nege tatıdy! Erkin ánin áýeletkende seniń janyń da (onyń daýsyna ilese alsa) ántek bir bıiktep, keremetteı tazaryp shyǵa keledi. Sahnadaǵy qarapaıym da bekzat bolmysyna qarap, eriksiz "qazirgi talaı ánshińiz osy kisiniń qolyna sý quıýǵa jaramaıdy-aý" degen oıǵa qalasyń. Al Ramazan Stamǵazıevtiń qońyr daýsy qońyr samaldaı janyńdy juqa ǵana jelpip, kóńildiń pernelerin aıalaı basyp ótedi.»
Keshti uıymdastyrýshy «Adyrna» ulttyq etnografıalyq birlestiginiń jetekshisi Arman Áýbákir: «Kók túrkiler dúnıeni dúbirletip, búkil álemdi osy jylqylardyń arqasynda bıledi. Jylqy arqyly jańa órkenıetti alyp keldi. Biz de sol jylqyny nasıhattaý arqyly qazaqtyń rýhyn kóteremiz, ózimizdiń ǵurpymyzdy, saltymyzdy nasıhattaý maqsatynda osy keshti uıymdastyrdyq. Jylqyǵa qatysty túrli aspapta oryndalatyn san-alýan shyǵarma bar. Solardyń basyn qosyp, konsert ótkizdik. Konsert aldaǵy ýaqytta jalǵasyn tabatyn bolady»- deıdi.
Atalmysh konsertti «Almaty» tele arnasy túsirdi. 1 mamyr merekesine oraı efırden kórsetiletin bolady. Qapy qalmańyzdar.
