Almaty oblysyndaǵy 100 shaqyrymnan astam jolǵa kúrdeli jóndeý jumystary júrgiziledi. Bul týraly aımaqtyq qoǵamdyq keńes otyrysynda Almaty oblysy jolaýshylar kóligi jáne avtojoldar basqarmasynyń jetekshisi Erjan Jasybaev habarlady.
Bıyl oblysta toǵyz búdjettik baǵdarlama júzege asyp jatyr. Berilgen mindetterdi oryndaýǵa shamamen 16 mıllıard teńge bólindi. Onyń basym bóligi, ıaǵnı 13 mıllıard teńge - oblystyq búdjet qarajaty.
Joldar men kópirlerdi salý jáne kúrdeli jóndeý jumystary Aqshı aýyly mańyndaǵy «Birlik-Almalyq-Rysqulov-Kazstroı-Aqbulaq» jáne «Saryózek-Qorǵas-Qoǵaly-Kóksý-Qarabulaq» baǵyty boıynsha júrgiziledi. Sonymen qatar, mekeme 100 mıllıonnan astam qarajattyń Qarasaı aýdanyndaǵy «Qaskeleń-SHamalǵan-Uzynaǵash» avtojolynyń jerasty jaıaý júrginshiler jolyn salýǵa jumsalatynyn habarlady. Sonda-aq Qarasaı men İle aýdandaryndaǵy «Dmıtrıevka-Mejdýrechenskoe-Qaraoı-Qapshaǵaı-Kúrti» jáne «Almaty-Óskemen» joldarynda kópir turǵyzý qarastyrylǵan.
Bıyl Qaratal aýdanyndaǵy «Taldyqorǵan-Úshtóbe-Byjy-Muqyr» magıstralinde, Kóksý aýdanyndaǵy «Balpyq bı-Aqtekshe» magıstralinde, Jambyl jáne Sarqan aýdandaryndaǵy «Uzynaǵash-Besmoınaq» jáne «Ekiasha-Amanbókter» tas joldaryndaǵy asfált tósemderi jańartylady.
