Memleket basshysy Nursultan Nazarbaev Almaty oblysyna sapary barysynda  óńirdiń  burynǵy eldegi    qyzylsha sharýashylyǵyndaǵy jetekshilik rólin qaıta jańǵyrtý boıynsha júrgizilgen aýqymdy jumys barysymen tanysty. 

Elbasyna jergilikti agrarshylardyń jetistigi Eskeldi aýdanynda ornalasqan «Nam» sharýashylyq qojalyǵynyń jumysy arqyly usynyldy.

Eki jyl buryn aıtylǵan naqty tapsyrmalardy iske asyrý barysy týraly oblys ákiminiń orynbasary Serikjan Beskempirov aıtty. Búginde óńirde qant qyzylshasyn egý alańy 2500 gektardy quraıdy. Ákimniń orynbasary Almaty oblysynda qant qyzylshasyn jınaý endi bastalǵanyn habarlady, alaıda alǵashqy nátıjeler kóńil qýantarlyqtaı. Bir túp  - 6.5-7 keli ónim berýde. Bul oblys agrarshylary gektardan 700 sentnerden astam ónim jınaıdy degen sóz. Ótken jyly ınvestorlardyń arqasynda toqtap turǵan Kóksý qant zaýyty qaıta iske qosyldy. Bıyl jańǵyrtý, qalpyna keltirý jumystary júrgizilýde.

Budan basqa, Nursultan Nazarbaev qyzylsha men soıa egistikterin aralady. Óńir noý-haýy - elektrondy jer kartasymen tanysty. Jańa engizilim kómegimen árbir qazaqstandyq óńirdiń egis alańdarynyń jaǵdaıymen tanysa alady. Bul sharýashylyq qojalyqtarynyń óz jer alańdaryn paıdalanýdyń tıimdiligin baqylaýǵa múmkindik beredi.

Qazaqstan Prezıdenti agroónerkásiptik keshen basshylarymen kezdesti. Óńirdiń jetekshi fermerleri men agrarshylary Memleket basshysyna óz jetistikteri jaıly aıtyp berdi.

 «Almaty oblysy qant qyzylshasy, júgeri, almasy arqyly  keńinen tanymal bolyp kelgen», - dep atap ótti  Nursultan Nazarbaev jumys sapary barysynda. - Sondyqtan osy daqyldardy egý alańyn arttyryp qana qoımaı, sapasyna da basa den qoıý qajet. Respýblıkada otandyq qanttyń úlesi nebári 10 paıyzdy quraıdy, bul kórsetkishti ulǵaıtyp, Kóksý, Eskeldi qant zaýyttaryn jańǵyrtýdy jalǵastyryp, Aqsý aýdanynda  qaıta jóndeý jumystaryn bastaý kerek».