Almaty oblysynda «Jas kásipker mektebi» ashylady. Bul joba «Bıznestiń jol kartasy - 2020» bıznesti qoldaý men damytýdyń biryńǵaı baǵdarlamasy aıasynda qolǵa alynǵan. Bul jóninde Almaty oblysynyń óńirlik komýnıkasıalar qyzmetinde ótken brıfıńte oblystyq kásipkerler palatasynyń ókilderi málimdedi, dep habarlaıdy Baq.kz.

- Jastardyń ınovasıalyq jáne kásipkerlik áleýetin ashýǵa járdemdesetin mektepte kásipkerlik negizderin, sonyń ishinde bıznes-jospar, marketıńtik jospar, damý strategıasyn ázirleýdi, sondaı-aq kásipkerlik psıhologıany meńgerip shyǵýdy oblystyq kásipkerler palatasynyń tájirıbeli bıznes-trenerleri úıretedi. Mekteptiń tyńdaýshylary 18-29 jas aralyǵyndaǵy azamattar bola alady. Oqytý qorytyndylary boıynsha bıznes-josparlaryn sátti qorǵaǵan jaǵdaıda, tyńdaýshylarǵa sertıfıkat beriledi, - deıdi Almaty oblystyq kásipkerler palatasynyń kásipkerlikti qarjylyq emes qoldaý bóliminiń basshysy Erlan Datqaev.

Qyzyqty jobalar «Ideıalar jármeńkesi» baıqaýynda tanystyrylady. Al sonyń ishindegi úzdikteri keıin «Bıznestiń jol kartasy - 2020» baǵdarlamasynyń sheńberindegi memlekettik grantty alýǵa qatysý múmkindigine ıe bolady. Onda kez kelgen azamat bar bilgenin, tájirıbesin, jetken jetistigin, bastamalaryn iske asyrýǵa múmkindigi bar.

Almaty oblysy ákimdiginiń baspasóz qyzmetiniń málimetinshe, «Jas kásipker mektebi» jobasy memlekettik tilde ústimizdegi jyldyń 31 qazanynan bastap 4 qarashaǵa deıin, al orys tilinde 7 qarashadan 11 qarashaǵa deıin «Damý» KDQ» AQ kásipkerlerge qyzmet kórsetý ortalyǵynda ótedi.

Oqytýǵa ótinishter osy jyldyń 13 qyrkúıeginen bastap 28 qazanǵa deıin Almaty oblysynyń kásipkerler palatasynda qabyldanady.