Ótken aptada qorytyndylanǵan úkimettegi kadrlyq taǵaıyndaýlar burynǵylarynan asa qatty aıyrmasy boldy dep aıta almaımyz. Bıliktiń ár tarmaǵynda túrli laýazymdy atqaryp júrgen sheneýnikterdi biriniń ornyna birin qonjıtqan ádettegi aýys-túıis boldy. Bıliktiń ár tarmaǵynda deımiz-aý, jańa premer de, onyń eki orynbasary da sol úkimetten uzamaǵan, biri mınıstr, biri kvazımemlekettik sektordaǵy kompanıanyń basshysy eken ǵoı, aıtsa da. Bul taǵaıyndaýlar qoǵamda oń baǵa alsa, eldiń tek áıteýir bir ózgeristerdi qalaǵandyǵynan, aldyńǵy úkimettiń, naqtyraq aıtqanda onyń basshysynan mezi bolǵandyǵynan dep túsiný kerek.
Sonymen, bul Úkimet quramynan jańa esim kóre almadyq. Ádilet mınıstrligine, jańadan qurylǵan Din isteri jáne azamattyq qoǵam mınıstrligine, Ortalyq saılaý komısıasyna taǵaıyndalǵan basshylar da Aqorda «kolodasynda» burynnan júrgen, bastysy aýyz toltyryp aıtarlyqtaı iskerligimen de, el arasyndaǵy harızmasymen de erekshelenbegen jandar. Prezıdent jańa oryn jańa múmkindik beredi, jumysyn shıratady dep sendi me eken, osyndaı sheshim qabyldady. Osy oraıda, Elbasy aqyry jańadan eshkimdi ákelmeıdi eken, tym bolmaǵanda úlken qyzmetke táýelsizdik jyldary aralasqan, táýelsiz Qazaqstannyń ekonomıkasyn kóterýge, saıasatyn jetildirýge úlesterin qosqan, qazir saıasattan syrtqary júrgen jastardy nege janyna tartpaǵan eken degen de oıǵa qalasyz.
Osyndaı aýys-túıister kezinde qarjyger Oraz Jandosovtyń úkimettegi orny oısyrap turǵanyna kóz jetkizesiz. Táýelsizdiktiń alǵashqy jyldarynda-aq prezıdent janyndaǵy Joǵary ekonomıkalyq keńeste bólim basqarǵan, ár jyldary Ulttyq bank tóraǵasy, qarjy mınıstri, tabıǵı monopolıalardy retteý jáne básekelestikti qorǵaý agenttiginiń basshysy, premer-mınıstrdiń birinshi orynbasary syndy laýazymdardan ótken Oraz Álıuly búginde premer bolmasa da, ekonomıkalyq bloktyń bir mınıstrligine ıe bola alarlyq tulǵa.
Ekonomıkalyq reformalar tyǵyryqqa tirelgen, ósim kemip, Ulttyq qordy kemirip jatqan tusta qarjyger, ár jyldary prezıdent keńesshisi, kiris, qarjy mınıstri, Qazaqstannyń ınvestısıalyq qoryn basqarǵan Zeınolla Kákimjanovty nege bir synap kórmeske? Qazir jeke kásipker retinde qalyptasyp úlgergen eks-sheneýniktiń sońǵy jyldarda jınaǵan tájirıbesi prezıdenttik reformalardy iske asyrýda iske alǵysyz deı alamyz ba?
Oǵash qylyqtary, oılanbaı aıtylǵan sózderimen qoǵamda kúlkige ushyrap jatatyn mınıstr, depýtat kelinshekterdi kórgende biraz vedomstvoda vıse-basshylyq baspaldaqtardan ótken Janat Ertilesova eske túsetini ras. Aıtsa da, Janat Ertilesova hanymdy parlamenttegi jańa búdjetti bekitý jónindegi jumysshy tobynan kórip qaldyq.
Áleýmettik blokta da atqarylar is kóp. Keri ketip jatqandary da joq emes. Alda mindetti áleýmettik-medısınalyq 
saqtandyrý júıesin engizý jumystary tur. Halyqtyń barlyq bóligin qamtıtyn, ár shańyraqqa tikeleı qatysy bar bul reformany júzege asyrý sala basshysyna ońaıǵa soǵady dep aıta almaımyz. Mundaı qıyn tapsyrmalardy oryndaý naǵyz eńbektorylardyń ǵana qolynan keledi. Prezıdenttiń nege memlekettik qyzmet, zeınetaqy júıesi salasynda birshama reformalardy júzege asyrýdy uıymdastyrǵan Álıhan Báımenovti «jaryqqa shyǵarmaı» otyrǵany túsiniksiz. El arasynda «patamýshta» degen atpen tanymal bolǵan Serik Ábdenovti de sońǵy zeınetaqy reformasynyń qurbany bop ketti deıtinder bar. Áıtpese, Bishimbaevtiń bilgenin Ábdenov bilmeıdi deı almaısyz. Qazirgi otyrǵan jeri de («QazMunaıGaz» UK vıse-prezıdenti) jaman emes, deı turǵanmen, «bılikke jastar kelýi kerek» degen urandardy tek estip qana qoımaı, is júzinde kórgimiz keletini de ras.
Úlken saıasattan, laýazymdy qyzmetten shet qalǵandar bul tizimmen shektelmeıdi. Baǵyn bızneste synap, qoǵamdyq qyzmette kóshbasshy bop júrgen eks-sheneýnikter jeterlik. Olardyń barlyǵy el seniminen shyqty, «saıası ólikke» aınaldy deý asyǵystyq ta bolar. Biri elge jaqpasa, biri Elbasynyń qyryna ilikti. Endi biri túrli yqpaldy toptarǵa jaqpaı shettetildi. Tek shettetilip qana qoımaı, saıası alańǵa syǵalaý múmkindiginen birjola aıyrylyp, bılik jaqqa attap baspaıtyndaı bolǵan sıaqty.
Saılaý Bek
