Taldyqorǵan men Balpyq bı kenti arasyndaǵy jańa jol qurylysynyń negizgi bóligi jyl sońyna deıin aıaqtalady. Tek Baqtybaı aýyly men Balpyq bı kentin kesip ótetin joldy jóndeý kelesi jylǵa qaldyrylmaq. Bul týraly "Qazavtojol" ulttyq kompanıasynyń ókilderi málimdedi. Qurylysy 2012 jyly bastalsa da áli salynyp bitpeı jatqan joldy "Nur Otan" partıasynyń ortalyq apparat qyzmetkerleri kórip shyqty. Jumys toby sondaı aq, Taldyqorǵannyń ońtústik-batys aýdanyndaǵy qurylysy turalap turǵan 5 turǵyn-úıdiń jaǵdaıymen de tanysty, - dep habarlaıdy Qamshy.kz "Jetisý" arnasyna silteme jasap.
Jertólesi ǵana bar bul 5 turǵyn-úıdiń qurylysy jyl sońyna taman qaıta qolǵa alynýy múmkin. Jumysqa salǵyrttyq tanytqan burynǵy merdiger mekemege qatysty sot úkimi shyqqan. Jobaǵa bólingen qarjy qaıtarylǵan. 290 páterli úılerdiń jobalyq-smetalyq qujattary jańadan jasaldy. Endi úı qurylysyn jalǵastyrýǵa nıetti kompanıalarǵa tender jarıalanbaq. Sonymen birge nysannyń jobalyq quny da qaıta qaralady.
Biraq jobaǵa jaýapty «Báıterek» AQ salynatyn úıdiń ár sharshy metrin 140 myń teńgeden asyrmaımyz deıdi. Onyń ústine nysan qurylysy "Nurly jol" baǵdarlamasy aıasynda qaıta jandanady. Úı qoldanysqa berilse myńdaǵan adamnyń baspana máselesi sheshilmek. Al qazir qurylystyń qolǵa alynbaýy osy aýdannyń ınfroqurylymyn jaqsartýǵa kedergisin keltirýde.
Qurylysy jyrǵa aınalǵan taǵy bir joba Taldyqorǵan men Balpyq bı kenti arasyndaǵy jańa avtojol. Nebári 24 shaqyrymǵa sozylǵan joldy salý jumystary tórtinshi jylǵa jalǵasýda. Oǵan sebep ártúrli, degenmen osy jyldyń sońyna taman negizgi bóligi aıaqtalady. "Qazavtojol" kompanıasynyń ókili osylaı deıdi. Biraq tolyǵymen qoldanysqa ótpeıdi, Baqtybaı aýyly men aýdan ortalyǵyn kesip ótetin joldy jóndeý kelesi jylǵa qalady.
Jol salýshy mekemeniń elýden astam tehnıkasy qazir tynymsyz jumys istep tur. "Nurly jol" baǵdarlamasy arqyly bólingen qarajat kúshimen halyq jol azabynan qutylady. "Nur Otan" partıasynyń ortalyq apparat qyzmetkerleri jol qurylysynyń qalaı júrip jatqanyn óz kózderimen kórip shyqty.
Al mynaý Balpyq bı kentindegi kúndelikti qaıtalanatyn kórinis. Bolashaqta bazar mańyndaǵy osy jol jóndelip, sý jańa trassaǵa aınalady. Alaıda kólik keptelisi sol qalpy qalýy múmkin. Sebebi, jol salý jobasynda jolaýshylar ótetin aspaly kópir nemese jerasty ótkeli qarastyrylmaǵan. Astanadan kelgen jumys toby bul máseleni nazarǵa alyp, tıisti quzyrly organdarǵa jetkizýge ýáde etti.
