Sońǵy kezde teatr tóńireginde jaǵymdy jańalyqtar men tyń bastamalar kóbeıip keledi. Sondaı sharalardyń biri - M.Áýezov atyndaǵy Qazaq Memlekettik akademıalyq teatryndaǵy «Syrlasý» uıymynyń ashylýy. «Syrlasý» uıymynyń negizgi maqsaty teatrǵa kórermenderdi, ásirese jastar jaǵyn kóptep tartýǵa, kórermen men teatr ujymynyń baılanysyn jaqsartý. Keshe M.Áýezov atyndaǵy Qazaq Memlekettik akademıalyq teatryndaǵy «Syrlasý» uıymy akterlerimen kezdesý ótkizdi. Kezdesýge belgili jas ónerpazdar: «Serper» Jastar syılyǵynyń laýreaty Almas Shaıahmetov pen Gúlnur Shyńǵysova qatysyp, kórermenderdiń suraqtaryna jaýap berdi. Rýhanı áńgime órbip, ártister kórermenmen oı bólisti. Áńgime barysynda «Serper» jastar syılyǵynyń laýreaty, akter Almas Shaıahmetov óziniń ómirlik maqsattary teatrmen tyǵyz baılanysty ekenin aıtady: «Bizdiń basty maqsattarymyz da teatrmen baılanysty. «Eńbek etseń erinbeı, toıady qarnyń tilenbeı» degendeı, eńbegimizdiń jemisin kórip, teatrdyń arqasynda jetistikterge jetip jatyrmyz. Kórermenderimiz kóbeıe bersin, Qazaq teatry jasasyn! Biz jaqsy, jarqyn obrazdardyń sahnaǵa alyp shyǵyp, oınaýǵa barmyz», - deıdi. Al, «Bir qoıylymnyń daıyndyǵyna qansha ýaqyt ketedi?» degen kórermen saýalyna Gúlnur Shyńǵysova: «Teatr sahnasyna bir qoıylymdy shyǵarý úshin keminde 3-4 aı ýaqyt arnalady. Eń aldymen, bir aı ýaqyt boıy pesa taldanady, artyq-kemi túgendelip, keıipkerler belgilenedi. 2-3 aıda sahnaǵa shyǵyp, daıyndala bastaısa, sońǵy aıy tolyq daıyndyqqa arnalady",- dep jaýap berdi. «Qaı qaladaǵy teatrlarǵa jıi at basyn burasyzdar» degen kórermen suraǵyna qos akterdiń oıy bir jerden shyqqan sekildi. Ekeýi de múmkindiginshe ózge teatrlardaǵy áriptesterimen únemi baılanysta ekenin aıtyp ótti: «Ár teatrdyń el rýhanıatynda ózindik orny bar, ár qaısysy ózinshe qoıady. Sondyqtan, Ǵ.Músirepov atyndaǵy balalar jáne jasóspirimder teatry men M. Lermontov atyndaǵy orys Memlekettik akademıalyq teatrdyń jaqsy qoıylymdaryna baryp turamyz», -dedi. Aıta keter jaıt, «Syrlasý» uıymynyń mundaı kezdesýdi alǵash ótkizip otyrǵan joq. Osyǵan deıin «Syrlasýda» qonaqta belgili aktrısalar Saltanat Baqaeva men Baqtıar Qoja, Quman Tastanbekov pen Merýert Ótekesheva bolǵan edi. Teatrdyń kórermendermen jumys jasaý bóliminiń meńgerýshisi teatrtanýshy Saltanat Ábilǵazıeva atalmysh  shara týraly: «Syrlasý» uıymynyń negizgi maqsaty teatr akterleri men kórermenderdiń arasynda altyn kópir bolý. Óıtkeni, Áýezov teatrynyń akterlerimen kezdesip, suhbattasyp, syrlasý ol kúnde qaıtalana bermeıtin jaıt. Bul ákemteatrdyń kórermenderge jasaǵan úlken syıy, jol ashýy. Búgingi kezdesý erekshe ótti. Sebebi, án aıtyldy. Ártister kórermenderge jańa qyrlarymen tanyldy», - dep sharany qorytyndylady.