Búgin álemdegi mıllıardttaǵan musylman úshin eń ulyq mereke Qurban aıt bastaldy. Oraza aıttan soń 70 kúnnen keıin toılanatyn meıram elimizde memlekettik mereke sanatyna ıe, sondyqtan alǵashqy kúni resmı demalys retinde jarıalanǵan. Aıtty toılaý aıt namazyn oqýdan bastalady. Taldyqorǵandyq jamaǵat osy mindetti oryndaý úshin mine Almaty oblysyndaǵy eń úlken "Iman" meshitine kelip jatyr, - dep habarlaıdy Qamshy.kz "Jetisý" arnasyna silteme jasap.
Tań raýandap atqany sol edi, turǵyndar meshitke qaraı aǵyldy. Ádettegideı qoǵamdyq kólikter de qasıetti mereke úshin tańnan jumysqa kirisip, kópshilikti Alla úıine jetkizdi. Árbir musylman ǵusyl dáret alyp, boıyn tazartyp alǵan. Al jetisý jerindegi eń úlken "Iman" meshitiniń ishi jamaǵatqa lyq toldy. El jınalǵansha ımam ýaǵyz aıtyp, 3 kúndik merekede jasalatyn ıgi amaldardy túsindirdi.
Jurtpen birge ýaǵyz tyńdap, namaz óteýge kelgenderdiń arasynda Almaty oblysynyń ákimi Amandyq Batalov ta bar. Merekeni toılaýdy meshitten bastaǵan ákim barsha jetisýlyqtarǵa izgi nıetin bildirdi.
Osydan soń barsha qaýym aıt namazyna jyǵyldy. Taldyqorǵan óńiri boıynsha bıylǵy Qurban aıt namazynyń bastalýy saǵat 7 ge sáıkes keldi. Iaǵnı, kúnniń kókjıekten naıza boıyndaı kóterilgendeı ýaqytynda jamaǵat Qaǵbaǵa júzin qaratty.
Qurban aıttyń basty mindetteriniń biri - qan shyǵarý, ıaǵnı mal soıý. Namazdan soń kópshilik qurban shalý rásimine qatysty. jamaǵat jaratýshyǵa jalbarynyp tilek tiledi, sadaqa berdi. Keıin «aıttaýdy» bastap ketti.
Qurban aıt kúni adam balasynyń jomarttyǵy synalady. Sondyqtan, meshit qaýymdastyǵy múmkindigi shekteýli jandar men qart kisilerdi aıt namazynan soń úılerine kólikpen tegin jetkizdi. Al "Samuryq" taksı parki jol aqysyna 100 teńge jeńildik jasady. Jalpy úsh kúndik aıt merekesinde musylmandar barynsha meıirimdi bolýy kerek, kóterińki kóńil kúıde, keshirimdi bolýǵa tyrysý qajet. Osy arqyly aıttyń qýanyshyn sezdirý óte saýapty isterge jatady eken.
Taldyqorǵandyqtar jyldaǵydaı aıtty erekshe etip toılady. Toı dýman ásirese meshitterde qyzya tústi. Aıtshylap kelgen jurt ulttyq sport oıyndarynan synǵa tústi. Palýandar boz kilemde kúresip, balalar asyq oınap jarysty. Otbasylyq túrli baıqaýlar ótip, aıttyq syılyqtar berildi.
Meshit ujymy bıyl da qaıyrymdylyq sharalaryn uıymdastyrdy. Jaǵdaıy tómen otbasylary men zaǵıp jandarǵa jáne múgedekter qoǵamdyq uıymdaryna qurbandyqtyń etin taratty.
Qurban aıtty toılaýdan ózge qazir álem musylmandary arasynda shamasy kelgenderi qajylyqqa barǵan. Bıyl elimizden barlyǵy 3 myńǵa tarta azamat osy paryzyn óteýge nıet bildiripti. Bul byltyrǵyǵa qaraǵanda myń adamǵa kem eken. Qajylar Ýmrany ótep, Mına men Arafada qulshylyq qylyp, Muzdalıfadan tas alyp shaıtanǵa atady. Allaǵa qulshylyq qylyp, kúnálárin keshirýdi suraıdy.
