Qumdaǵy alyp baqqa -1 jyl. Panfılov aýdanynda aýmaǵy 1100 gektar jerge jemis baǵyn otyrǵyzǵan "Jarkent Frýkt" seriktestigi -- búgin óziniń eń alǵashqy týǵan kúnin atap ótýde. Jetisý jerinde alma baqtaryn jańǵyrtý jospary aıasynda aýqymdy jobaǵa kirisken kompanıanyń jyldyq jumysymen-- "Agrarlyq nesıe korporasıasynyń" tóraıymy Gúlnaz Atamqulova bastaǵan qarjylyq sala ókilderi tanysyp qaıtty. Esterińizge sala ketelik, Gúlnaz Atamqulova Almaty oblysynyń ákimi-- Amandyq Batalovpen keshe ǵana óńirde baq salasyn birlese damytý boıynsha -- arnaıy memorandýmǵa otyrǵan bolatyn, - dep habarlaıdy Qamshy.kz "Jetisý" arnasyna silteme jasap.
Jaıqala jetilip kele jatqan jap-jasyl jas baq. Jyl buryn qyp-qyzyl qum aralas qunarsyz myna shańdaýyt taqyr dala bolǵan. Adam aıtsa, nanǵysyz. "Jarkent frýkt" seriktestigi aınalasy 1 jylda alyp jemis baǵyna aınaldyrdy. 1 emes, 10 ıa 100 emes, 1100 gektar alqapta kúnge umytylǵan sansyz jas kóshet samsap tur. 2,5 mln dana,-deıdi esep-qısabyna jaýapty mamandar. Ósimtalyn, ónimdiligi joǵarysyn Túrkıa men Ózbekstannan tańdap ákelipti. Jemis túri alýan. Josparlary keshendi. Klasterlik.
"Qalaýyn tapsa, qar janady"... Qý taqyr búginde alyp agrokeshenge aınala bastaǵan. 15 mlrd tenge ınvestısıanyń ıgi iske jumsalǵany kórinip tur. Jyl ishinde árbiri 1000 sharshymetrlik 2 tyńaıtqysh pen ózge de qajet dúnıeler úshin qos qoıma salyndy. 4 baseın, sý nasos jáne meteostansalar iske qosylǵan. Jalpy uzyndyǵy 24 shaqyrymdy quraıtyn qorshaý ornatylyp jatyr. Seriktestik qımyly shıraq. Qaýyrt iske 97 arnaıy tehnıka tartypty. Búginge nysanda 650 adam jumys jasaýda. Basym bóligi kórshi Aıdarly aýylynyń turǵyndary. Bolashaqta naýqandyq jumyspen 1500 adam qamtylmaq. Al, joba nátıjeleligin arttyrý úshin kompanıa otandyq jáne sheteldik ǵalymdar kómegine súıenýde.
Jalpy,seriktestik maqsaty zor. Baq alqabyn keler jyly taǵy da 1000 gektarǵa ulǵaıtpaq. «Agrarlyq nesıe korporasıasy» AQ basqarma tóraıymy Gúlnaz Atamqulova bastaǵan myna topty shaqyrýynyń da mánisi sonda. Qomaqty qosymsha qarjylyq resýrstar taýyp, isterin ilgeriletpek. Jergilikti bılik te bul tanystyrylys sońy sátti aıaqtalýynan úmitti. Aýdanda qolǵa alynǵan ár jobanyń jemisin jergilikti halyq kóredi,-deıdi. Aıtýynsha, Jarkent óńirinde jaqsy jańalyq kóp.
Agronomdar alyp baqtyń alǵashqy jemisiniń dámin keler jyly-aq tatpaq. Jappaı ónim 2017- jyly jınalady. Ázirge tamshylatyp sýǵaryp, baladaı baptap ósirip jatyr. Mezgili jetkende, gektarynan 50 tonna ónim alýdan úmitti. İshki naryq óz aldyna, ónim kórshi Reseı men ortalyq Azıa elderine eksporttaýǵa jetkilikti bolaryn aıtady.
