Egemendigimizdi alyp, esimizdi jınap, eńsemizdi kótergen kúnnen bergi kezeńge qarasaq, el tarıhynda eleýli oqıǵalar az bolǵan joq. Tóbesi kók tiregen kóp qabatty záýlim úıler, oqý oshaqtary, óner ordalary birinen soń biri boı kóterip, elimiz eldi mekenderiniń ajary eselene tústi.
Kúni keshe elordada erteńgi el bolashaǵyna eńbek etetin eki birdeı ǵımarattyń qurylysy aıaqtaldy. Onyń biri – aýdany 14 myń sharshy metr bolatyn, 1200 oqýshyǵa laıyqtalǵan, 48 oqý kabıneti bar №84 mektep-lıseıi bolsa, ekinshisi – otandyq bı óneriniń damýyna dańǵyl jol ashatyn Qazaq ulttyq horeografıa akademıasy. Osynaý óner men bilim ordalaryna Elbasy Nursultan Nazarbaev arnaıy baryp, ashylý saltanatyna qatysty.
Elbasy jınalǵandardy jańa mekteptiń ashylýymen quttyqtap, táýelsizdik jyldarynda bilim berý salasyn damytý jáne qajetti ınfraqurylymdy qalyptastyrý úshin memleket kóp kúsh-jiger jumsaǵanyn atap ótti.
– Kóptegen jastarymyz shet elderde bilim alýda, bul jyldarda elimiz boıynsha 1700-den astam mektep, sonyń ishinde zıatkerlik mektepter ashyldy. Bıyl 60 jańa oqý ornyn ashý josparlanýda. Osy qadamdar jas urpaqtyń ósip-órkendeýi men elimizdiń bolashaǵy úshin jasalyp jatyr. Bul mektep sheıh Halıfpen kelisim negizinde sonyń qarajaty esebinen salyndy. Sol úshin oǵan alǵys aıtamyn, – dedi Nursultan Nazarbaev.
Oqý ornynyń ınfraqurylymy 30 oryndyq oqý zaly bar kitaphanany, 360 oryndyq májilis zalyn, sport zalyn, júgirý jolaǵyn, sondaı-aq fýtbol, basketbol, voleıbolmen aınalysýǵa arnalǵan alańdardy qamtıdy.
Sodan soń Elbasy Qazaq ulttyq horeografıa akademıasynyń ashylý rásimine qatysyp, qazaqstandyqtardy elordada jańa joǵary oqý ornynyń boı kóterýimen quttyqtady.
– Búgin biz Astanada jańa óner ordasyn saltanatty túrde ashyp otyrmyz. Bul jerde ulttyq balet pen bı sheberleriniń jańa shoǵyry oqyp, tárbıelenedi. Munda qazaqstandyq salt-dástúr damyp, álemdik deńgeıdegi bı ónerin damytýǵa jańasha qadamdar jasalatyn bolady. Ulttyq horeografıa akademıasy – bizdiń elimizde ǵana emes, búkil Ortalyq Azıa elderindegi osy úlgidegi alǵashqy joǵary oqý orny. Onda qazaqstandyqtarmen birge, ózge shet elderdiń shyǵarmashyl daryndy jastary oqıtyn bolady. Elimizdegi bul akademıa ýaqyt óte kele búkil Eýrazıadaǵy balet pen bı sheberlerin daıyndaıtyn jetekshi ortalyqtardyń biri bolatynyna senemin, – dedi Qazaqstan Prezıdenti.
Memleket basshysy akademıadaǵy oqý isi bı men balet óneriniń negizderinen bastap joǵary oqý ornynan keıingi magıstrler men doktoranttardy daıyndaýǵa deıingi bilim berý úrdisiniń barlyq deńgeıin qamtıtynyn atap ótti.
– Bul kóp deńgeıli kásibı horeografıalyq bilim beretin tolyq sıkldy akademıanyń mańyzdylyǵy men biregeıligin eskere otyryp, oǵan meniń Jarlyǵymmen «Ulttyq joǵary oqý orny» aıryqsha mártebesi berildi. Sizder osy jańa óner ordasynda joǵary halyqaralyq ólshem men bilim berýdiń otandyq qaıtalanbas standartyn qalyptastyrýǵa tıistisizder. Sizder Qazaqstannyń bı men balet óneriniń jańa ulttyq brendin ornyqtyrady dep senemin, – dedi Nursultan Ábishuly.
Sondaı-aq, Qazaqstan Prezıdenti oqý ornynyń búdjetten tys qarajat kózderine salynǵanyn aıtyp, sáýletshiler men qurylysshylarǵa atqarǵan jumystary men shyǵarmashylyq eńbekteri úshin alǵys bildirdi.
Rásim barysynda Nursultan Nazarbaev akademıa rektory A.Asylmuratovaǵa balerınanyń shaǵyn músinin tabys etti.
– Bul músindi túlekter jyl saıyn birinshi synyp oqýshylaryna tabystaıdy, ol balet ártisteriniń kásibı deńgeıi ósýiniń jalǵastyǵy men akademıanyń dástúrler sabaqtastyǵynyń sımvoly bolady, – dedi Elbasy.
A.Asylmuratova Qazaqstan Prezıdentine bildirgen senimi men akademıaǵa jaǵdaı jasaǵany úshin alǵys aıtty.
– Biz úshin munda biliktiligi joǵary ártister, pedagogtar, ónertanýshylar ǵana emes, sondaı-aq elimizdiń naǵyz patrıottaryn, ónerdi qurmetteıtin mádenıetti azamattardy tárbıeleý mańyzdy. Akademıa qazirgi moıyndalǵan mektepterdiń qatarynan óziniń laıyqty ornyn tabady dep úmittenemiz. Biz sol úshin bar kúshimizdi salamyz, – dedi akademıa rektory.
Sońynda Nursultan Nazarbaev oqytýshylar men stýdentterge eńbek pen oqýda jetistikke, jańa shyǵarmashylyq jumysta tabysqa jetýine tilektestik bildirdi.
Qazaqstan Prezıdenti akademıanyń Qurmetti qonaqtar kitabyna qoltańba jáne «Ýaqyt quty-kapsýlasyna» estelik jazba qaldyrdy. Budan bólek, Elbasy balet zalyn, jataqhanany, asqana men birinshi synyp oqýshylaryna arnalǵan oqý synyptaryn aralap kórdi.
Nursultan Nazarbaev saltanatty rásimniń qorytyndysy boıynsha ótken BAQ ókilderine arnalǵan brıfıń barysynda barsha qazaqstandyqtardy kele jatqan Bilim kúnimen quttyqtap, oqýshylarǵa, ata-analar men muǵalimderge tabys pen myqty densaýlyq tiledi.
Raýan QAIDAR, «Egemen Qazaqstan»
