Qazaq televızıasyna qatysty syn az aıtylyp júrgen joq. Qansha jerden «Óz qazaǵymyz ǵoı, jaman jerin jasyra turaıyq» desek te ondaǵylar qazaq qoǵamyna túrli tosynsyı usynýyn qoıar emes. Sońǵy ýaqytta onsyz da arzan kúlki men shýyldaqqa tolyp ketken otandyq arnalardyń birinde, dálirek aıtsaq, Ulttyq arna mártebesine ıe «Qazaqstannan» buryn (qazaq televızıasynan) kóz kórip, qulaq estimegen baǵdarlama kórdik. Tanymal júrgizýshi Láılá Sultanqyzy júrgizetin «Áıel baqyty» jobasy basqa taqyryp tappaǵandaı tórin transvıstıtke (jynysyn aýystyrǵan adam) usynypty.
Bul jerde «Tórin usyndy» degendi sózdiń ádemiligi, tartymdy tirkes úshin qoldanyp otyrǵan joqpyz. Baǵdarlamaǵa qonaq retinde Qostanaıdan qalap aldyrǵan álgi transvıstıt bir ózi baǵdarlama júrgizýshisi bar, arnaıy sarapshy retinde shaqyrylǵan psıhology bar, ýrolog-andrology bar, Ularbek Nurǵalymdaı aqyny bar, barlyǵynyń aýzyn jaýyp otyrdy. Tipti, Qazaqstandaǵy jigitterdiń pálenbaı paıyzy transvıstıt bolǵysy keledi degendeı statısıka aıtyp, álek qyldy.
Baǵdarlama uıymdastyrýshylarynyń álgi «qonaqtyń» transvıstıtterdi psıhologıalyq aýytqýy bar naýqasqa teńegen mamanǵa shaptyqqanyna qarap shaqyrýdaǵy maqsaty oryndaldy deı almaımyz. Telebaǵdarlamalar arasyndaǵy reıtıńi joǵary otbasylyq baǵdarlamaǵa qatysqan álgi adasqan respýblıkalyq efırden óz múddesin taratyp ketti. Sóıtip, «Áıel baqyty» artyq qylamyn dep, tyrtyq qyldy.
Láılá Sultanqyzy, telearna basshylyǵy qyz-kelinshekterge baǵyttalǵan baǵdarlamaǵa taqyryp tappaı qınalyp júr deı almaımyz. Qoǵamda áıelderdiń, qyz-kelinshekterdiń qanshama qıyn taǵdyryna kýá bolyp júrmiz. Kúıeýleri qumar oınaıtyn, para alǵany úshin dúnıesi tárkilenip, temir torǵa toǵytylǵan áıelderdi júzdep tabýǵa bolady. Búginde kúıip turǵan dinı ekstremızm, radıkaldyq aǵymdardyń «jańalyqtary», Konstıtýsıa men el zańdaryn moıyndaýy qıyn salafıler arasynda keń tarap bara jatqan talaq máselesi, din negizderin qate túsinýdiń saldarynan qysqa ýaqyt ishinde qyryq baıǵa tıgen kelinshekter taǵdyrynyń ózi biraz áńgimege arqaý bolmaı ma?
«Áıel baqytyn» kórip otyryp, osyndaı oıǵa qaldyq. Baǵdarlama jıirkenish týǵyzatyn mundaı negatıvti elekten ótkizbeı el nazaryna usynǵany durys bolmady. Osy habarǵa arnaıy shaqyrylǵan aqyn Ularbek Nurǵalymulynyń «Jaǵamdy emes, keńirdegimdi ustadym!» degeninen asyp eshteńe aıta almaspyz. Bulaı kete berse, telearnalarymyzdyń sýısıd jasaýǵa oqtalyp, aman qalǵandardyń «tájirıbesimen» de «tań qaldyrýy» ǵajap emes.
Záýre Tońbolatqyzy
